Ինչ էին անում դեղահաբերը կեքսի մեջ

Արդարադատության նախարարության «Արթիկ» ՔԿՀ-ի աշխատակիցները, օպերատիվ տվյալներն իրացնելով, դատապարտյալ Ա. Մ.-ի անվամբ քաղաքացի Վ. Ն.-ի բերած հանձնուքի «կեքս» տեսակի խմորեղենի միջից հայտնաբերել և առգրավել են 0,4 գրամ ընդհանուր կշռով 4 դեղահաբ:

ԱՆ քրեակատարողական վարչության հանրային կապերի բաժինը տեղեկացնում է, որ մեկ այլ՝ «Նուբարաշեն» ՔԿՀ-ի դատապարտյալ Կ. Դ.-ն հանձնուքների ընդունման և հանձնման սպասասրահի աղբահանման աշխատանքներից հետո ենթարկվել է անձնական խուզարկության:

Արդյունքում դատապարտյալի համազգեստի աջ գրպանից հայտնաբերվել և առգրավվել է ծխախոտի տուփ, որում եղել է պոլիէթիլենային թաղանթով փաթեթավորված 5 փաթեթ: Փաթեթներից մեկում եղել է 5 գրամ ընդհանուր քաշով կանաչավուն զանգված, իսկ մյուսների մեջ տարբեր քանակների, ամբողջական և կոտրտված «B8» դաջվածքով դեղահաբեր, նաև սպիտակավուն զանգված:

Հայտնաբերված թմրամիջոցների ընդհանուր կշիռը 20,6 գրամ է: Թմրամիջոցներն ուղարկվել են փորձաքննության: Այս դեպքերով կատարվում է հետաքննություն: