Հեռուստաընկերության լրատվական ծառայության տնօրենն արդեն սրբագրում է խոսքերը

«Արմենիա» հեռուստաընկերության լրատվական ծառայության տնօրեն Գագիկ Մկրտչյանը Tert.am–ի հետ զրույցում անդրադարձել է հեռուստաընկերության երկու աշխատակիցներին ՀՀ վարչապետ Հովիկ Աբրահամյանի անունը սխալ գրելու պատճառով աշխատանքից ազատելու մասին` մամուլի հրապարակումներին:

Մկրտչյանը հայտարարել է, թե «Արմենիա» հեռուստաալիքի «աշխատակիցները ոչ թե ազատվել են աշխատանքից, այլ այսուհետ կաշխատեն «Ժամը» լրատվական կիրակնօրյա թողարկման խմբագրակազմում»։ Ուշագրավ է, որ մինչ այդ նույն Մկրտչյանը aravot.am-ի հետ զրույցում բառացիորեն հայտարարել է հետեւյալը. «Եղել է ընդամենը վրիպակ, ոչ մի դիտավորություն չի եղել, մեղավորներն արդեն աշխատանքից ազատվել են»:

Ակնհայտ է, որ Մկրտչյանի բոլորովին այլ հայտարարությունը, թե իբր լրագրողն ու մոնտաժողն անցել են այլ աշխատանքի, պայմանավորված է վարչապետ Հովիկ Աբրահամյանի հայտարարությամբ: Հիշեցնենք, որ Հովիկ Աբրահամյանը կոչ է արել հեռուստաընկերությանը` վերանայել աշխատակիցների ազատման հարցը: Զավեշտալի է, որ միայն վարչապետի հայտարարությունից հետո պետք է «պարզվեր», որ լրագրողն ու մոնտաժողը «այլ աշխատանքի» են տեղափոխվել:

Նշենք, որ մինչ այս այլ աշխատանքի ոչ մի տեղափոխում էլ չի եղել: Լրագրողին, որի անունը չենք ցանկանում հրապարակել, կանչել եւ հայտարարել են, որ ազատված է աշխատանքից: Երկու երեխաների մայրն այն հոգեվիճակում էր, որ անգամ չէր կարողանում շփվել գործընկերների հետ: