Հայաստանում գնաճն ավելի բարձր է, քան Վրաստանում, բայց` ցածր, քան ՄՄ անդամ երկրներում

Երեք ամսվա կտրվածքով` Հայաստանում արձանագրվել է 1.2 տոկոս գնաճ, մինչդեռ  նույն ժամանակահատվածում ԱՊՀ երկրներից ամենաբարձր գնաճն արձանագրվել է Բելառուսում' 4.9 տոկոս, այնուհետեւ' Ղրղզստանում' 3.3 տոկոս: Հարեւան երկրներից Վրաստանում ամենացածր գնաճն է 0.9 տոկոս: Իսկ Եվրամիության 27 երկրների ընդհանուր միջին գնաճը, 3 ամսվա կտրվածքով, կազմել է 0.1 տոկոս: Այսօր լրագրողներին այս թվերը ներկայացրեց ԱՎԾ գների վիճակագրության և միջազգային համադրումների բաժնի պետ Գուրգեն Մարտիրոսյանը:

Բանախոսը հայտնեց նաեւ, որ մարտ ամսին գնանկում միայն Վրաստանում է արձանագրվել' 0.1 տոկոսի չափով: Եվրամիության 27 երկրներից, վերջին 3 ամիսների կտրվածքով, գնանկում է արձնագրվել ընդամենը 6-ում, իսկ մնացած 21-ում արձանագրվել  է գնաճ:

«Մարտ ամսին միայն, փետրվարի համեմատ, գնանկում արձանագրվել է Բուլղարիայում' 0.3 տոկոս, 4 երկրում գները մնացել են անփոփոխ, իսկ 22-ում արձանագրվել է գնաճ: Ընդհանուր գնաճը մարտ ամսին կազմել է 0.7 տոկոս: ԱՊՀ երկրներում մարտ ամսի ամենաբարձր' 2.2 տոկոս գնաճն արձանագրվել է Ուկրաինայում, այնուհետեւ` Ղրղզստանում' 2.1 տոկոս: Ցածր գնաճ է արձանագրվել Մոլդովայում' 0.3 տոկոս, եւ Վրաստանում արձանագրվել է 0.1 տոկոս գնանկում»,- նշեց Գուրգեն Մարտիրոսյանը:

Ինչ վերաբերում է Մաքսային միության անդամ երկրների գնաճային ցուցանիշներին, ապա այս տարվա մարտին, փետրվարի համեմատ, Ռուսաստանում 1 տոկոս գնաճ է արձանագրվել, Բելառուսում' 1.3 տոկոս գնաճ, Ղազախստանում' 1 տոկոս գնաճ: Իսկ 3 ամիսների կտրվածքով' Հայաստանում գնաճը կազմել է 1.2 տոկոս, Ռուսաստանում' 2.3 տոկոս, Բելառուսում' 4.9 տոկոս, Ղազախստանում' 3.3 տոկոս: