«Հարսնաքարի» գործով վճռի հրապարակման ընթացքում տեղի ունեցած միջադեպի փաստով քրեական գործ է հարուցվել

Ավան և Նոր Նորք վարչական շրջանների ընդհանուր իրավասության դատարանում «Հարսնաքարի» գործով վճռի հրապարակման ժամանակ տեղի ունեցած միջադեպի փաստով ոստիկանության Նոր Նորքի քննչական բաժնում հարուցվել է քրեական գործ ` ՀՀ քրեական օրենսգրքի 343-րդ հոդվածի 1-ին մասի հատկանիշներով: Այս մասին yerkir.am-ին հայտնեց ՀՀ դատախազության հանրային կապերի վարչության պետ Շահեն Տոնոյանը:

Նրա խոսքով` քրեական գործ հարուցելու համար հիմք են հանդիսացել ՀՀ գլխավոր դատախազությունում ուսումնասիրված`  դատական նիստի ձայնային արձանագրման կրիչում առկա տվյալները, ինչպես նաև մամուլում հրապարակված տեսանյութերը: Հիշեցնենք, որ մարտի 24-ին, երբ դատավոր Դավիթ Հարությունյանը հրապարակեց «Հարսնաքարի» գործով վճիռը, ըստ որի` գործով 6 մեղադրյալները դատապարտվեցին 12-ական տարվա ազատազրկման, այն հարուցեց դահլիճում գտնվող ամբաստանյալների հարազատների, մասնավորապես` Գարիկ Մարգարյանի մոր` տիկին Նունեի զայրույթը:

Հիշյալ դեպքի վերաբերյալ  yerkir.am-ի հրապարակած տեսանյութը` ստորև: