«Հարսնաքարի» գործով ամբաստանյալը հրաժարվել է պաշտպանից

«Հարսնաքար»ի գործով 12 տարվա ազատազրկման դատապարտված Արման Խաչատրյանը հրաժարվել է իր պաշտպան Ավագ Լալայանից: Այս մասին yerkir.am-ը տեղեկացավ պաշտպանից: Հարցին, թե ի՞նչն է եղել հրաժարվելու պատճառը, պաշտպանը պատասխանեց, որ դա իրեն չի հետաքրքրում:

Yerkir.am-ի հետ զրույցում Արմանի կինը` Հասմիկը, հայտնեց, որ իրենք նախկին պաշտպանից դժգոհ չեն, բայց… «Անկեղծ ասած` նա չկարողացավ Արմանի անմեղությունը պաշտպանել: Նա խելացի է, պարզապես մի փոքր կաշկանդվածություն ունի և չի կարողանում լավ ներկայացնել անմեղության հիմքերը»,- ասաց նա:

Ի դեպ, այսօր  «Հարսնաքարի» գործով 12 տարվա ազատազրկման դատապարտված ամբաստանյալներից 5-ը` Արման Խաչատրյանը, Նորայր Հայրապետյանը, Արման Բաղդասարյանը, Դավիթ Ադամյանը եւ Արթուր Բաբլոյանը, և նրանց պաշտպաները դիմել են ՀՀ վերաքննիչ դատարան` բողոքարկելով այս տարվա մարտի 24-ին Ավան և Նոր Նորք վարչական շրջանների դատավոր Դավիթ Հարությունյանի կայացրած վճիռը: Նշենք, որ ամբաստանյալներից Գարիկ Մարգարյանը և նրա պաշտպանը` Մարինե Թովմասյանը, վերաքննիչ բողոքը ներկայացրել էին դեռևս ապրիլի 23-ին: