Փորձում են օգտվել քաղաքական իրավիճակից ու բարձրացնել տրանսպորտի ուղեվարձը

Տրանսպորտի վարձավճարը վաղուց բարձրացած կլիներ, եթե չլինեին վերջին ներքաղաքական զարգացումները, քանի որ դա անմիջականորեն կապված է երկրում տեղի ունեցող քաղաքական գործընթացների հետ: Այս մասին այսօր լրագրողների հետ հանդիպման ժամանակ հայտարարեց տնտեսագետ, փորձագետ Դավիթ Գևորգյանը: «Հիմա փորձում  են օգտվել քաղաքական իրավիճակից և «անցկացնել» այդ հարցը»,- ասաց նա:

Ըստ Գեւորգյանի` կարիք չկա մեծ գումարներ ծախսել և Եվրոպայից փորձագետներ հրավիրել, ովքեր մեզ կսովորեցնեն, թե ինչպիսին պետք է լինի մեր  տրանսպորտը: Նշենք, որ, միջազգային փորձագետների հաշվարկներով,  երևանյան տրանսպորտի ուղեվարձը հասնում է 200-250 դրամի:

«Ի՞նչն է փոխվել մեր տրանսպորտում: 200 դրամ պետք է վճարենք, որ վարորդները չհայհոյե՞ն»,- նշեց փորձագետը և հավելեց, որ իրենց հաշվարկներով`  ուղևորափոխադրման ինքնարժեքը 70 դրամ է: Այսինքն` հնարավոր է 30 դրամով տրանսպորտի որակը բարձրացնել: Ըստ նրա` թանկացումը պայմանավորված է մեր իշխանությունների` բյուջեն լցնելու քաղաքականությամբ: «Երբ որ այս դաշտը ստվերից դուրս գա, շատ մականունավոր գծատերեր կհայտնվեն փաստի առաջ»,- ասաց նա:

Իրավապաշտպան ակտիվիստ Անի Կաղինյանը ևս կարծում է, որ տրանսպորտի ուղեվարձի թանկացումը կապված է քաղաքական գործընթացների հետ: Անդրադառնալով տրանսպորտի ուղեվարձի վերանայման համար ստեղծված հանձնաժողովին` ակտիվիստը նշեց, որ այնտեղ հասարակական սեկտորի ներկայացուցիչներից ոչ ոք ընդգրկված չէ: «Այդ հանձնաժողովը ստեղծված է քաղաքապետարանի շահերը պաշտպանելու համար»,- ասաց նա: