Շուշան Պետրոսյանին երգելու չեն կանչել

Այս տարվա ամանորյա միջոցառումներին Ազգային ժողովի ՀՀԿ-ական պատգամավոր, երգչուհի Շուշան Պետրոսյանը որևէ ձևաչափով չմասնակցեց, նրա երգերը հնչում էին միայն արխիվային կադրերով. գրում է «Ժողովուրդ»-ը:

Թերթը փորձել է Շուշանից անձամբ պարզել, թե ինչու այլևս չի երգում, հոգնե՞լ է, թե՞ մանդատն է խանգարում: Թերթի հետ զրույցում օրենսդիր մարմնի ներկայացուցիչ երգչուհին հայտնել է, որ իրեն ոչ մի հեռուստաընկերությունից չեն հրավիրել` տոնական ծրագրերին մասնակցելու:

«Հեռուստաընկերությունների այս մոտեցումը կբացատրեմ նրանց նեղամտությամբ: Կարծել են, որ պատգամավոր եմ և կմերժեմ իրենց հրավերը»,- վրդովված նշել է Շուշան Պետրոսյանը՝ հավելելով, որ երգն իր կյանքն է, ինչպե՞ս կարող էր մերժել երգելու հրավերը: