Ճիշտ կլիներ, որ Սիրիա մեկնեին նաև այլ խմբակցություններից ներկայացուցիչներ. Աղվան Վարդանյան

Այսօր ԱԺ նիստում ԱԺ նախագահ Հովիկ Աբրահամյանը հայտարարեց, որ Սիրիայի Քեսաբ քաղաք են մեկնել ԱԺ ՀՀԿ խմբակցության պատգամավորներ Նաիրա Կարապետյանը, Սամվել Ֆարմանյանը, Լևոն Մարտիրոսյանը, Արման Սահակյանը և անկախ պատգամավոր Էդմոն Մարուքյանը, ովքեր Երևան վերադառնալուց հետո կզեկուցեն Քեսաբում տիրող իրավիճակի մասին:

ԱԺ ՀՅԴ խմբակցության քարտուղար Աղվան Վարդանյանը ԱԺ հայտարարությունների ժամին նշեց, որ ուրախ է, որ Սիրիա են մեկնել մի խումբ պատգամավորներ, սակայն ուրախ չէ, որ Սիրիա է մեկնել միակուսակցական ձևաչափով պատվիրակություն: «Փառք Աստծո, Հայաստանի խորհրդարանը միակուսակցական չէ, և շատ ավելի կոռեկտ ու ճիշտ կլիներ, եթե պատվիրակության կազմում լինեին ներկայացուցիչներ նաև այլ քաղաքական խմբակցություններից: Քաղաքական մեծամասնությունն անընդհատ խոսում է երկխոսության կարևորության մասին, սակայն անտեսել մյուս կուսակցություններին, կարծում եմ, ճիշտ չէ: Ճիշտ հասկացեք, մենք խնդիր չունենք, քանի որ Դաշնակցությունը նաև Սիրիայում է փորձում պաշտպանել հայության այդ հատվածի գոյապահպանման խնդիրները, սակայն նման գործելաոճը մեզ համար ընդունելի չէ»,- ասաց Աղվան Վարդանյանը:

Հովիկ Աբրահամյանը, արձագանքելով Աղվան Վարդանյանին, նշեց, որ միակուսակցական պատվիրակություն չի մեկնել Սիրիա, քանի որ դրա կազմում են նաև «Ժառանգության» խմբակցության քարտուղար Թևան Պողոսյանը և անկախ պատգամավոր Էդմոն Մարուքյանը:

ԱԺ ԲՀԿ խմբակցության պատգամավոր Վահան Բաբայանը նույնպես տարակուսանք հայտնեց Սիրիա մեկնած ԱԺ պատգամավորական պատվիրակության կազմի վերաբերյալ` այն անվանելով «կասկածելի»: