Քաղաքական դալտոնիզմից մինչև քաղաքական իմպոտենտ. ընդդիմություն-իշխանություն հակամարտություն` ԱԺ ամբիոնից

Այսօր ԱԺ նիստում «Ժառանգություն» խմբակցության ղեկավար Ռուբեն Հակոբյանը եւ ԱԺ ՀՀԿ պատգամավոր Խոսրով Հարությունյանը հակադարձեցին միմյանց: Ռուբեն Հակոբյանը, անդրադառնալով Խոսրով Հարությունյանի արտահայտությանը, թե ընդդիմությունը սև ակնոցով է ամեն ինչին նայում ու սևացնում է ամեն ինչ, ասաց, որ դա առնվազն քաղաքական դալտոնիզմ է, որովհետև ընդդիմությունը ոչ թե սևացնում է, այլ իրականությունն է ներկայացնում:

«Քաղաքական դալտոնիզմ» արտահայտությունից Խոսրով Հարությունյանը վիրավորվել էր ու հայտարարեց, որ ընդդիմությունն էլ քաղաքական իմպոտենտ է, որ, ընտրություններին հավաքելով ոչ քիչ թվով ձայներ, կարճ ժամանակ անց փոշիացրեց այդ ձայները և վստահությունը:

«Ինչ է՝ ես չե՞մ կարող հայտնել կարծիք, որը չի համապատասխանի ընդդիմության ասածին: Բարի եղեք պատգամավորական հարաբերությունների էթիկան պահել: Ես երբևէ որևէ մեկին անձնական վիրավորանք չեմ հասցրել, սա ամենակարևոր քաղաքական ամբիոնն է, բարի եղեք հարգել այն»,- սրտնեղեց Խոսրով Հարությունյանը: