Համեղ է, որովհետև ո՛չ իշխանություն է, ո՛չ ընդդիմություն

Այսօր մեկնարկել է «Ա1+» հեռուստաընկերության «Այո-ոչ» քաղաքական ռեալիթի շոուն` սահմանադրական փոփոխությունների քարոզարշավի շրջանակներում: Մի շարք ՀՀԿ-ական պատգամավորներ, «Ոչ»-ի կողմնակիցների հետ, եղան Մեղրիում, որտեղ մեղրեցիներից մեկը նրանց հյուրասիրեց արքայանարնջի չիր:

ԱԺ աշխատակազմի ղեկավար Հրայր Թովմասյանն անգամ մասնակցեց չրի պատրաստմանը: Պատգամավորների քաղաքական ու կենցաղային մտքերը խառնվեցին իրար: 85 տարեկան մի տատիկ մրգերով լի զամբյուղով մոտեցավ մայրաքաղաքից եկած հյուրերին: ՀՀԿ-ականները միանգամից մրգեր վերցրեցին` համտեսելու,  ինչը արձանագրեցին «Ոչ»-ի կողմնակիցները` ասելով. «Պահը բաց չեք թողնում ու ժողովրդի ձեռքից վերցնում եք, էլի»:

Հրայր Թովմասյանն էլ արձանագրեց, որ չիրը շատ համեղ է. «Այս չիրը համեղ է, որովհետև ո\'չ ընդդիմություն է, ո\'չ էլ իշխանություն, ինքը ընդամենը չիր է»: