Վարչապետի առաջարկը ժամանակավրեպ է. «Դեմ եմ»-ի անդամ

Քիչ առաջ Yerkir.am-ը զրուցեց «Դեմ եմ պարտադիրին» քաղաքացիական շարժման անդամ Տիգրան Մարտիրոսյանի հետ, ով հայտնեց իր անձնական տեսակետը վարչապետ Տիգրան Սարգսյանի` երկխոսելու առաջարկի վերաբերյալ:

«Երկխոսությունն ինքնին լավ բան է, սակայն այս պահին այդ առաջարկը ժամանակավրեպ էր, քանի որ Սահմանադրական դատարանի որոշմանը մեկ շաբաթ է մնացել: Այլ կլիներ, եթե այդ առաջարկն արվեր մեկ ամիս առաջ կամ ավելի շուտ»,- ասաց նա:

Մարտիրոսյանի խոսքով` թերևս, մինչև ՍԴ որոշման ընդունումը պետք է սպասել: Իսկ հարցին` միգուցե այս քայլով կառավարությունը փորձում է պասիվացնե՞լ նախաձեռնության գործունեությունը, Տիգրան Մարտիրոսյանը պատասխանեց, որ, այո, նման տպավորություն է ստեղծվում, սակայն գուցեև լուրջ առաջարկ ունեն անելու:

Նա ընդգծեց, որ այս ամենը նախաձեռնության դիրքորոշումը չէ, այլ ընդամենը` իր կարծիքը: «Դեմ եմ»-ի դիրքորոշումը ավելի ուշ կհրապարակվի: