Պարտաճանաչ գործատուն չպետք է նայի` պարտադիր վճարումները սանկցիա ունեն, թե` ոչ. նախարար

«Ես այդքան պատասխանեցի այդ հարցին: Իմ պատասխանները չե՞ք հասկացել, չի՞ բավարարում»,- Yerkir.am-ի հարցին ի պատասխան` բորբոքված ասաց ՀՀ աշխատանքի և սոցիալական հարցերի նախարար Արտոմ Ասատրյանը: Իսկ մենք ընդամենը հետաքրքրվում էինք, թե, ի վերջո, ինչո՞ւ են գործատուները, չնայած ՍԴ որոշմանը, կատարում պարտադիր կուտակային վճարումները:

«Ես շատ պարզ բան եմ ասել: Գործատուն ունի օրենքով սահմանված պարտավորություն՝ որպես հարկային գործակալ կատարել պահումներ և փոխանցել պարտադիր կուտակային վճարներ: Դա օրենքով սահմանված պարտավորություն է, բայց այսօր կասեցված է այդ պարտավորությունը իրականացնող սանկցիան: Էլ պարզ ո՞նց ասեմ: Այն գործատուն, որը պարտաճանաչ գործատու է, երբևէ չպետք է նայի` դա սանկցիա ունի, թե` ոչ: Չե՞ք ընդունում դա: Եթե օրենք է, դա պետք է կատարվի»:

Լրագրողների դիտարկմանը, թե այդ դեպքում, ի՞նչ դեր ունի ՍԴ որոշումը, եթե գործատուները, միևնույն է, կատարելու են պարտադիր կուտակային վճարները, նախարարն արձագանքեց. «ՍԴ որոշումները չեն մեկնաբանվում: ՍԴ որոշումն ապահովել է, որ գործատուների համար չառաջանան տույժ ու տուգանքներ»: