Սեւանից տարեկան 240 միլիոն խմ ջուր կվերցնեն

Ջրառի ծավալների մեծացումը Սեւանի համար վտանգ չի ներկայացնում. պարզաբանում է բնապահպանության նախարարը: Կառավարությունն այսօր հավանության արժանացրեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում փոփոխություններ կատարելու մասին որոշումը, որով նաեւ հաստատվում է Սևանա լճից ջրի բացթողումների տարեկան առավելագույն չափաքանակի փոփոխության վերաբերյալ ժամանակավոր ծրագիրը:

Այդ ծրագրի հիմնական նպատակն է Սևան-Հրազդան էներգետիկ-ոռոգման համակարգից սնվող ոռոգման համակարգերի սպասարկման տակ գտնվող ոռոգելի հողատարածքների ոռոգումն իրականացնելու նպատակով անհրաժեշտ ջրաքանակի ապահովումը, ինչպես նաև ամբողջական ջրամատակարարման համար համապատասխան պայմանների ստեղծումը։

Նախատեսվում է մինչև Սևջուր գետի և Արարատյան դաշտավայրի ստորգետնյա ավազանի սակավաջրության խնդրի լուծումը, ինչպես նաև առաջնահերթ ջրամբարաշինության միջոցառումների իրականացման ավարտը, ժամանակավորապես՝ մինչև 2019թ. հունվարի 1-ը, Սևանա լճից ջրի բացթողնման տարեկան չափաքանակի փոփոխության իրականացում` առավելագույնը աահմանելով մինչև 240 մլն խորանարդ մետր:

Այս կապակցությամբ ՀՀ բնապահպանության նախարար Արամ Հարությունյանից հետաքրքրվեցինք, թե ի՞նչ հետեւանքներ կարող է ունենալ այս ժամանակավոր ջրառը Սեւանա լճի համարա: Նախարարի պատասխանները ներկայացնում ենք տեսանյութում: