"Զվարթնոց" օդանավակայանի կլոր մասնաշենքը հաստատ կքանդվի

«Զվարթնոց» օդանավակայանի կլոր մասնաշենքը քանդելու խնդիրն արդեն լուծված է կառավարության հետ' հաստատ քանդվելու է, քանի որ «Արմենիա միջազգային օդանավակայաններ» ընկերության կողմից կառավարությանը ներկայացված մաստեր-պլանը, որով նախատեսված էր նաեւ  «Զվարթնոց»-ի  կլոր մասնաշենքի ապամոնտաժում, հաստատվել է կառավարության կողմից. լրագրողների հետ հանդիպման ժամանակ  այսօր մեկ անգամ եւս վերահաստատեց Քաղաքացիական ավիացիայի գլխավոր վարչության պետ Արտյոմ Մովսիսյանը:

Մաստեր-պլանը հաստատելու ժամանակ ՀՀ վարչապետ Տիգրան Սարգսյանը հանդես է եկել առաջարկով, որն ընդունելի է եղել նաեւ Էռնեկյանի թիմի համար, որ եթե մշակութային ժառանգության պահպանության խնդիրներ կան, ապա պետք է փորձ արվի այգու, պարկի պես վայր ստեղծել, որտեղ կհավաքվեն մշակութային կամ ճարտարապետական արժեք ներկայացնող շենք-շինությունների մակետները:

«Հիմա այդ խոսքը ես փոխանցել եմ նաեւ Էռնեկյանի թիմին' կոնցեսիոներին, իրենք դրական են ընդունել, հիմա այդ փոփոխությունը նրանք մոտ օրերս կներկայացնեն, որ դրական են ընդունում: Բայց լուծման վերջնական տարբերակը, թե ինչպիսին կլինի, նրանք մինչեւ այս տարվա վերջը ժամանակ են խնդրել` ներկայացնելու համար»,- ասաց Մովսիսյանը:

Նա տեղեկացրեց նաեւ, որ շենքի տեղափոխում եւս չի լինելու, քանի որ դա մեծ ծախսեր է պահանջում, եւ կառավարությունը կլինի, թե` մեկ այլ կառավարիչ, այդ ծախսերի տակից շատ մեծ դժվարությամբ դուրս կգա: