Բելգիայի Հայ Դատի հանձնախումբը անհրաժեշտ է համարում ՄԻԵԴ-ի` Փերինչեքի գործով վճռի բողոքարկումը

Այսօր ՀՅԴ Բելգիայի Հայ Դատի հանձնախմբի պատվիրակությունը հանդիպում է ունեցել Բելգիայում Շվեյցարիայի դեսպան Բենեդիկտ դը Սերժայի հետ: Պատվիրակության անդամները դիմել են դեսպանին խնդրանքով` փոխանցել Շվեյցարիայի կառավարությանը Մարդու իրավունքների եվրոպական դատարանի` դեկտեմբերի 17-ի` Դողու Փերինչեք-Շվեյցարիա վճիռը բողոքարկելու հորդորը, քանի որ այն դատապարտում է Շվեյցարիային Փերինչեքի խոսքի ազատությունը կաշկանդելու համար եւ կասկածի տակ է դնում Հայոց ցեղասպանության իրողությունը:

Հանձնախմբի ներկայացուցիչները դեսպանին ներկայացրել են դատվարության հիմնական կետերն ու վճռի հիմնավորումները, որոնց հիման վրա բողոքարկվել է Շվեյցարիայի դաշնային դատարանի` Փերինչեքի գործով վճիռը, նաեւ հայության դիրքորոշումները: Նշվել է, որ դա Փերինչեքի կանխամտածված մարտահրավերն է Շվեյցարիային` Հայոց ցեղասպանության ժխտումը քրեականացնող օրենքի համար: Ընդգծվել է, որ Հայոց ցեղասպանության 100-ամյա տարելիցի նախաշեմին նման դատավճիռը, որն իրականում առաջինն է, որ ցեղասպանության ժխտման` օրենքով դատապարտումը համարում է խոսքի ազատության իրավունքի խախտում, ճանապարհ է բացում Եվրոպայում ոչ միայն հակահայ դրսեւորումների համար, այլ նաեւ հզորացնում է թուրքական ծայրահեղ շարժումները:

Հայ Դատի հանձնախումբը պատրաստակամւթյուն է հայտնել ամենայն աջակցություն ցուցաբերել Շվեյցարիայի դեսպանին, որ բողոքարկումը պաշտոնական ընթացք ստանա: