«1915-ը չհամեմատել Հոլոքոստի հետ». Թուրքիայի ԱԳՆ-ի անդրադարձը՝ Փերինչեքի գործով ՄԻԵԴ-ի վճռին

Երեկ ՄԻԵԴ-ի «Մեծ պալատը» հրապարակեց «Փերինչեքն ընդդեմ Շվեյցարիայի» գործով վճիռը, որով մերժեց Շվեյցարիայի հայցը: Համաձայն վճռի՝  շվեյցարական դատարանը սխալ է վարվել` Հայոց ցեղասպանությունը ժխտող Դողու Փերինչեքին քրեական պատասխանատվության ենթարկելով, սակայն Հայոց ցեղասպանության մասով ոչ հայանպաստ մի շարք ձևակերպումներ վճռից հանվել են կամ խմբագրվել Հայաստանի օգտին:

Այսպիսով` համաձայն ՄԻԵԴ-ի որոշման՝ Շվեյցարիայի դատարանների՝ Փերինչեքի դեմ հրապարակած դատավճիռը հակասում է խոսքի ազատության իրավունքին:

Թուրքիայի ԱԳ նախարարությունը «Փերինչեքն ընդդեմ Շվեյցարիայի» գործով վճռի մասին հայտարարություն է տարածել՝ այն համարեով «իրավական հաղթանակ»: Հայտարարության մեջ, մասնավորապես, ասված է. «Ժողովրդավարության, խոսքի ազատության և մարդու իրավունքների տեսանկյունից, 1915 թվականի իրադարձությունների վերաբերյալ վերջին տարիների ընթացքում մեր պետության ցուցաբերած համբերության և նրբանկատ քաղաքականության առումով, սա իրավական շատ կարևոր հաղթանակ է»:

Նշվում է նաև, որ «1915 թվականի իրադարձությունները բազում քննարկումների առարկա են դարձել և դրա վերաբերյալ տարբեր տեսակետներ են առաջ քաշվել»:

Թուրքիայի ԱԳ նախարարության կարծիքով՝ «1915 թվականի իրադարձությունները Հոլոքոստի հետ համեմատելն անհնար է»:

Հայտարարության մեջ նշվել է նաև, որ ՄԻԵԴ-ի որոշումը «նախադեպ կհանդիսանա» նմանատիպ դեպքերում: Նախարարության կարծիքով՝ «սա շրջադարձային որոշում է պատմության և օրենքի՝ քաղաքական նպատակներով չարաշահմանն ուղղված արժանի պատասխան տալու առումով»: