Էրդողանի կուսակցությունը կճանաչի՞ Ցեղասպանությունը

Թուրքիայի «Ազգայնական շարժում» կուսակցության խորհրդարանական խմբակցության փոխնախագահ Օքթայ Վուրալը հայտարարել է, թե Էրդողանի կուսակցությունը 200 հազար հայի հող հատկացնելու աշխատանքներ է իրականացնում. հայտնում է haberler.com-ը:

Թուրքիայի արտգործնախարար Ահմեդ Դավութօղլուին Երևան կատարած այցի ժամանակ «հայի բերանով» խոսելու մեջ մեղադրող Վուրալն ասել է. «Դու միջնո՞րդ ես: Տեղահանության հանգամանքներն ու թուրք ժողովրդի տեսանկյունը պատմելու փոխարեն այս ժողովրդի անցյալն ես վաճառում: «Արդարություն և զարգացում» կուսակցությունը պատրաստվում է Ցեղասպանությունը ճանաչել: Այդ արտահայտություններով հայերին ասում եք` դուք ճշմարիտ եք և դա օրինականացնում եք: Թուրքիան արդեն դադարել է ինքնապաշտպանվել: Հանձնվելու համար նյութ է փնտրվում: Ես պնդում եմ, որ Թուրքիան հող տալու ծրագրեր է մշակում: 200 հազար հայ բերելով` նրանց հող տալու աշխատանքների մեջ է»: