Պետք է շարունակեմ աշխատել և չեմ հանձնվի. Հենրիխ Մխիթարյան

Ֆուտբոլի Հայաստանի ազգային հավաքականի և Դորտմունդի  «Բորուսիա»-ի կիսապաշտպան Հենրիխ Մխիթարյանը UEFA.com-ին հետխաղյա ճեպազրույցի ժամանակ ասել է, որ իր թիմը ի վիճակի է հաղթել ֆրանսիական «Մարսել»-ին և ցանկալի արդյունքի հասնել:

Չեմպիոնների լիգայի խմբային փուլի 5-րդ տուրում Դորտմունդի «Բորուսիա»-ն  սեփական հարկի տակ  3:1 հաշվով առավելության հասավ իտալական «Նապոլի»-ի նկատմամբ, որին առաջին խաղում պարտվել էր 1:2 հաշվով:

«Բորուսիա»-ն հրաշալի խաղ ցուցադրեց: Իմ խաղընկերները հիանալի աշխատանք կատարեցին: Երեք պարտություններից հետո այս հաղթանակը մեզ անհրաժեշտ էր, մենք պարտավոր էինք հաղթել:

 Իհարկե, ցանկանում էի ինքս աչքի ընկնել, սակայն չստացվեց, ինչ արած:  Պետք է շարունակեմ աշխատել և չեմ հանձնվում: Իմ խնդիրն է ուժերս տալ թիմի  օգուտի  համար: Էական չէ` դարձա գոլի հեղինակ, թե` ոչ. ամենակարեւորը թիմի հաղթանակն է։

Բազմաթիվ պահեր ստեղծեցինք 2։1 հաշվի ժամանակ, քանի որ «Նապոլի»-ին պաշտպանությունում  ազատ տարածություններ էր թողել, և մենք կարողանում էինք ավելի հաճախ հարձակվել:

Չենք կասկածում, որ դուրս կգանք խմբից։ Սակայն «Մարսել»-ը հեշտ մրցակից չի լինի:  Ճիշտ է, նրանք միավոր չեն վաստակել, սակայն ամեն ինչ կանեն, որպեսզի  միավոր վաստակեն: Ամեն դեպքում գիտենք, թե ինչպես է պետք խաղալ այդ թիմի դեմ։ Կարծում եմ՝ կհասնենք ցանկալի արդյունքի»,- ասել է Մխիթարյանը:

 Հայ ֆուտբոլիստը «Նապոլի»-ի դեմ խաղում ստացել է ամենաբարձր գնահատականը: Թիմի գլխավոր մարզիչ Յուրգեն Կլոպը ևս մեկ անգամ հիացել է Մխիթարյանի խաղով: Գերմանական ԶԼՄ-ները «կախարդական» են անվանել Հենրիխի խաղը, իսկ միջազգային մամուլի որակավորմամբ՝ Մխիթարյանը  լավագույն խաղն է անցկացրել դորտմունդցիների կազմում:

Թեեւ նրան չի հաջողվել դառնալ ո'չ գոլի, ո'չ էլ գոլային փոխանցման հեղինակ:

Մխիթարյանը եղել է մեկնարկային կազմում և մասնակցել է ամբողջ հանդիպմանը: