6 հոգու սպանության մեջ կասկածվողը պետք է հանձնվի ՀՀ իշխանություններին

Մինչ ՀՀ և ՌԴ դատախազությունները բանակցում են Գյումրիում Ավետիսյանների ընտանիքի վեց անդամին սպանելու մեջ կասկածվող ռուս զինվորական, Գյումրիում տեղակայված ռուսաստանյան 102-րդ  ռազմակայանի տանկիստ` 18-ամյա Վալերի Պերմյակովին ՀՀ իշխանություններին հանձնելու վերաբերյալ, Գյումրիում կատարվում են համատեղ քննչական գործողություններ:

Yerkir.am-ի հետ զրույցում ՀՀ քննչական կոմիտեի նախագահի խորհրդական Սոնա Տռուզյանը հայտնեց, որ ներկայումս Գյումրի է մեկնել Քննչական կոմիտեի պետի տեղակալ Վահագն Հարությունյանը, ով ներկա է գտնվել Պերմյակովի հարցաքննությանը: Վերջինս ցուցմունք է տվել, պատմել դեպքերի զարգացման մասին:

Պարզելու համար, թե պրակտիկան ի՞նչ է ցույց տալիս և նման դեպքերում կասկածյալ անձը ո՞ր երկրի իշխանությունների կողմից պետք է քննչական գործողությունների ենթարկվի, Yerkir.am-ը զրուցեց միջազգային իրավունքի մասնագետ, իրավաբան Արա Ղազարյանի հետ:

«Միանշանակ, Հայաստանի կողմից` անկախ նրանից, որ նա զինվորական է և ՌԴ քաղաքացի: Հանցագործությունը կատարվել է ռազմաբազայից դուրս: Քաղաքացիությունն ու զինվոր լինելու հանգամանքը էական չեն: Սպանությունը կատարվել է Հայաստանի տարածքում, և միանշանակ, նա պետք է հանձնվի ՀՀ իշխանություններին»,- ասաց նա:

Դեռևս երեկ ռուսական կողմը քրեական գործ է հարուցել դասալքության, զորամասից ինքնակամ հեռանալու դեպքի առթիվ: Հարցին, թե այս դեպքում արդյո՞ք կարող է խնդիր լինել` կասկածյալին հանձնելու հետ կապված, Ա. Ղազարյանը պատասխանեց. «Պրակտիկայում ընդունված է, որ  եթե մեկ այլ պետության տարածքում հանցագործություն է կատարվում, և  հանցագործություն կատարած անձը հայտնաբերվում է մեկ այլ պետության տարածքում, ապա այդ պետությունը, որտեղ նա հայտնաբերվել է, չի հանձնում, սակայն պարտավորվում է նրան քրեական պատասխանատվության ենթարկել: Հիմա այստեղ  արդեն օրենքների համապատասխանեցնելու հարց կծագի: Իհարկե, դեռ վաղ է այդ մասին ասել, սակայն սպանության  մասով դա, միանշանակ, մեր իշխանությունների կողմից պիտի արվի»,- ասաց նա:

Հիշեցնենք, որ Պերմյակովը երեկ ուշ երեկոյան հայտնաբերվել է հայ-ռուսական սահմանը հատելու պահին և հանձնվել է ռուս զինծառայողներին: