Իսկ ինչո՞ւ չպետք է շարունակեմ պաշտոնավարել. Արագածոտնի մարզպետ

Արագածոտնի մարզպետ Սարգիս Սահակյանը կարծում է, որ կշարունակի պաշտոնավարել: «Իսկ ինչո՞ւ չպետք է շարունակեմ պաշտոնավարել»,- ՀՀԿ Խորհրդի եւ ԳՄ նիստերից հետո հայտարարեց մարզպետը:

Սահակյանի կարծիքով` նախագահն իր գրանցած արդյունքներից գոհ է: Yerkir.am-ի հարցին, թե` ումի՞ց էր դժգոհ, մարզպետը պատասխանեց. «Չկա, նման բան չկա, անկեղծ եմ ասում»: Խորհրդի նիստն, ըստ մարզպետի, սովորական, աշխատանքային նիստ էր:

Արագածոտնի մարզպետը դժվարացավ ասել, թե ինչու էր զայրացած Տավուշի մարզպետը: «Չգիտեմ, չեմ նկատել»,- ասաց նա:

Հարցին, որ եթե Շիրակի մարզպետի նման վատ արդյունքներ գրանցեր նախագահի համար, արդյո՞ք հրաժարական կտար, Սահակյանը նախ պատասխանեց, որ եթե-ներով չի առաջնորդվում, հետո էլ հիշեցրեց, որ Արագածոտնի մարզը երրորդ մարզն է, ուր Սերժ Սարգսյանը բարձր արդյունքներ է գրանցել:

Արագածոտնի մարզպետի տրամադրությունն այնքան բարձր էր, որ նա անգամ ՀՀԿ կենտրոնական գրասենյակի առջեւ` անձրեւի տակ կանգնած լրագրողներին թեյ խմելու հրավիրեց: