Եթե այսպես շարունակեմ` կհայտնվեմ ազգային հավաքականում. Դամե Դիոպ

Հունիսի 1-ին Սենեգալի օլիմպիական հավաքականը Արգենտինայի մայրաքաղաք Բուենոս Այրեսում ընկերական հանդիպում անցկացրեց Կոլումբիայի ազգային հավաքականի հետ (2:2): Սենեգալցիների մեկնարկային կազմում էր նաև «Շիրակ»-ի հարձակվողական ոճի կիսապաշտպան Դամե Դիոպը, ով դաշտում անցկացրեց 71 րոպե:

Ակումբի պաշտոնական կայքի հետ զրույցում Դիոպը խոսել է իր տպավորությունների մասին. «Ես արդեն երկու մրցաշրջան է` հանդես եմ գալիս «Շիրակ»-ում, և առաջին անգամ է, որ հրավիրվել եմ Սենեգալի օլիմպիական հավաքական: Իսկ իմ առաջին հանդիպումը շատ բարդ ստացվեց: Կոլումբիան շատ ուժեղ հավաքական է, նրանց կազմում հանդես են գալիս բարձրակարգ ֆուտբոլիստներ: Բայց մեզ հաջողվեց արժանի դիմակայություն ցույց տալ: Հանդիպումից հետո մարզիչն ասաց, որ գոհ է իմ ցուցադրած խաղից: Նա նաև հույս հայտնեց, որ եթե այսպես շարունակեմ, շատ շուտով կհայտնվեմ նաև ազգային հավաքականի կազմում»:

Դամե Դիոպը նաև նշեց, որ այս փորձն իրեն կօգնի ավելի վստահ հանդես գալ Եվրոպա լիգայում. «Առաջիկայում «Շիրակ»-ը մասնակցելու է Եվրոպայի լիգային, և այս հանդիպումից հետո ես ավելի վստահ կլինեմ իմ ուժերին: Ես ջանք չեմ խնայի, որպեսզի օգնեմ իմ թիմին առաջ գնալ Եվրոպա լիգայում»:

Ֆուտբոլիստը տեղեկացավ, որ «Շիրակ»-ի բոլոր երկրպագուները հետևում էին նրա ելույթին հավաքականում. «Նախ և առաջ ես կցանկանամ շնորհակալություն հայտնել Վարդան Բիչախչյանին և մեր մարզչական շտաբին ինձ վստահելու համար: Ես նրանցից շատ բան եմ սովորել: Իսկ մեր երկրպագուները, ինչպես միշտ, լավագույնն են, շնորհակալ եմ նրանց այդպիսի վերաբերմունքի համար»: