ՕԵԿ-ը զարմացած է կառավարության վրա. թեժ քննարկում` ԱԺ-ում

ԱԺ այսօրվա նիստում ՕԵԿ խմբակցության ղեկավար Հեղինե Բիշարյանն անդրադարձավ մեծ աղմուկ բարձրացրած` «Կանանց եւ տղամարդկանց հավասար իրավունքների եւ հավասար հնարավորությունների ապահովման մասին» ՀՀ օրենքում փոփոխություն կատարելու մասին օրենքի նախագծին, որը հանրության լայն շրջանակներ ընկալել էին որպես գենդերի մասին օրենք:

Հեղինե Բիշարյանը հայտարարեց, որ օրենքում «գենդեր» բառը թյուրըմբռնման տեղիք է տվել: Նա նշեց, որ իրենք առաջարկում էին հանել այդ բառը, օգտագործել «սեռ» կամ այլ հոմանիշ բառ, բայց այդ առաջարկությունները չեն ընդունվել:

ԱԺ ԲՀԿ խմբակցության քարտուղար Նաիրա Զոհրաբյանն էլ նշեց, որ իրենք համարժեք օրենքում «գենդեր» բառի փոխարեն օգտագործել են «կանաց եւ տղամարդկանց իրավահավասարություն», որը, բնականաբար, կառավարությունը չի ընդունել, ուստի ԲՀԿ-ն ձեռնպահ է քվեարկելու ՕԵԿ-ականների հեղինակած օրենքի նախագծին:

ԱԺ «Ժառանգություն» խմբակցության պատգամավոր Ալեքսանդր Արզումանյանն էլ առաջարկեց դեմ քվեարկել օրենքի նախագծին, իսկ ՀՅԴ խմբակցության ղեկավար Արմեն Ռուստամյանն առաջարկեց փոխել տարընթերցում կամ առարկություն առաջացրած ձեւակերպումը: «Թող մտնի օրակարգ, քննարկենք, միասին լուծում գտնենք»,- ասաց նա:

Ալեքսանդր Արզումանյանը հայտարարեց, որ Հեղինե Բիշարյանը համաձայնել է, որ օրենքի նախագծին դեմ քվեարկեն: Բիշարյանն, իր հերթին, հերքեց Արզումանյանի ասածը:

«Հեղինե Բիշարյանն ասել է` ձեր խղճով քվեարկեք: Եթե դեմ լինեի, ինչո՞ւ էի ասելու` քվեարկեք, կառավարությունը չի հանում «գենդեր» բառը, ի՞նչ հանձնաժողովի մասին է խոսքը»,- նշեց Բիշարյանը:

ՕԵԿ-ական պատգամավոր Հովհաննես Մարգարյանն էլ հիշեցրեց, որ նախագծի հեղինակը միայն Բիշարյանը չէ, նաեւ` ինքն է: «Ինձ համար զարմանալի է, որ փոփոխության նախագիծը կառավարությունը հետ է կանչում, որտեղ «գենդեր» բառը փոխարինվում էր կանանց եւ տղամարդկանց իրավահավասարության տերմինով»,- նշեց նա եւ հավելեց. «Ինչ ուզում եք «գենդերի» փոխարեն դրեք, միայն ընդունելի լինի հասարակության համար»:

Քննարկումից փոքր-ինչ բարկացած Վարդան Այվազյանն էլ հայտարարեց. «Կառավարության հետ խոսեք` կա'մ հանում ենք, կա'մ քվեարկում»: Խաչատուր Քոքոբելյանն էլ նկատեց, թե ինչու է ամեն ինչ կառավարության վրա գցվում. «Կառավարությունը ինչ նայում է ձախողում է, եթե կոալիցիոն ՕԵԿ-ը չի կարողանում կառավարության հետ համաձայնության գալ, արդեն տարակուսելի է»:

Ի վերջո, օրենքի նախագիծը հանվեց օրակարգից: