«ԱԺ աշխատակազմի վրա չեմ կասկածում, կառավարության վրա եմ կասկածում». կառավարության առաջարկը ԱԺ չի հասել

ԱԺ տնտեսական հարցերի հանձնաժողովում քննարկվում է «Ելք» խմբակցության ներկայացրած` «Շահումով խաղերի, ինտերնետ շահումով խաղերի և խաղատների մասին» Հայաստանի Հանրապետության օրենքում լրացումներ կատարելու մասին հարցը: Նշենք, որ հարցը քննարկվելու է լիագումար նիստում երկրորդ ընթերցմամբ: Հիմնական զեկուցող` «Ելք» խմբակցության պատգամավոր Էդմոն Մարուքյանը նշեց, որ միայն մեկ փոփոխություն է արվել:

«Այն անձանց, որոնց մուտքը խաղատուն դատարանի վճռով արգելված է, 300 հազարի փոխարեն տուգանել 500 հազարով: Մենք սկզբում նշել էինք 300 հազար, հիմա որոշել ենք ավելի խստացնել»,- ասաց նա:

Հարցով հարակից զեկուցող` ՀՀ ֆինանսների փոխնախարար Կարեն Թամազյանը նշեց, որ կառավարությունն արել է մի շարք առաջարկություններ, ու սկսեց թվել դրանք:

Հանձնաժողովի նախագահ Խոսրով Հարությունյանը, դիմելով փոխնախարարին, հայտնեց, որ իրենք ոչ մի առաջարկություն չեն ստացել: «Եթե կառավարությունն ուղարկել է առաջարկվող դրույթները, բա ո՞ւր են դրանք, ինչո՞ւ չենք ստացել»,- հարցրեց նա:

Թամազյանը շտապեց արդարանալ. «Գուցե աշխատակազմից չեն ուղարկել հանձնաժողով»:

Հարությունյանն էլ իրավիճակը շտկելու համար առաջարկեց, որ մյուս շաբաթ լիագումար նիստը սկսելուց մի օր առաջ` երկուշաբթի առավոտյան, հանդիպեն և քննարկեն կառավարության առաջարկները:

«Ելք» խմբակցության պատգամավոր Էդմոն Մարուքյանը նշեց, որ հենց Խոսրով Հարությունյանը նիստի սկզբում նշեց, որ թերացումներ չպետք է լինեն: «Նախագիծն առաջին ընթերցմամբ ստացվել է, ինքնաբացարկի ինստիտուտը հանել ենք կառավարության առաջարկով, կոմպրոմիսի ենք գնացել: Իբր մի հատ թուղթ ենք ստացել` առաջարկների, բայց իրականում ոչ ոք էլ չի ստացել: Սենց ո՞նց կլինի»,- ասաց նա:

Մարուքյանը նաև ընդգծեց, որ ԱԺ աշխատակազմին չի կասկածում: Աշխատակազմից էլ շտապեցին հայտնել, որ իրենք նման փաստաթուղթ չեն ստացել:

«Ես մեր աշխատակազմի վրա չեմ կասկածում, ես կասկածում եմ կառավարության վրա: Ես այս շենքի ոչ մի աշխատողի վրա չեմ կասկածում, հետևաբար` ես ընդամենը ուզում եմ հասկանալ` ի՞նչ էր ընթերցում փոխնախարարը»,- ասաց Էդմոն Մարուքյանը:

Ի վերջո, համաձայնության եկան` որպեսզի նախագիծը չտուժի, կառավարության առաջարկները հանձնաժողովը քննարկի երկուշաբթի առավոտյան:

«Ես ցավում եմ ու խոստանում եմ պարզել, թե որ օղակի թերացման արդյունքն էր սա, և կհասնեմ նրան որ այդ օղակը պատժվի, եթե կա այդպիսի օղակ»,- խոստացավ Հարությունյանը: