Լուկաշենկոն ու Սարգսյանը ''քվիթ եղան''

Այն տեսանյութը, որ հեռարձակվեց բելառուսական հեռուստաընկերություններից մեկով, որում նախագահ Սերժ Սարգսյանը քնած մարդու տպավորություն է թողնում, ոչ այլ ինչ էր, եթե ոչ պատասխան ամիսներ առաջ Լուկաշենկոյի Հայաստան կատարած այցի ժամանակ նկարահանված և համացանցում տարածված այն տեսանյութի, որում երեւում է, որ Լուկաշենկոյին սպասարկող ավտոմեքենայի մեջ շիկահեր կին է նստած: Հիշեցնենք, որ Լուկաշենկոն այդ օրերին Հայաստանում էր ԲՀԿ առաջնորդ Գագիկ Ծառուկյանի հրավերով:

Բելառուսի նախագահը շատ լավ տեղեկացված է այդ պատմությանը. չէ՞ որ բելառուսական կայքերը օգտագործեցին հայկական կայքերից մեկի ֆիքսած այդ կադրերը: Եվ, ի պատասխան դրան, հիմա էլ չի բացառվում, որ Բելառուսի նախագահի կողմից հակագրոհի հանձնարարություն էր իջեցված` գտնել, իսկ եթե չկա, ապա ստեղծել Սերժ Սարգսյանին ադեկվատ պատասխան տալու հնարավորությունը: Ստեղծելու համար ջանք չթափվեց: Ինչպես ասում են, «առիթն իր ոտքով եկավ», բայց սա չէ էականը, այլ այն, որ բոլորը շատ լավ գիտեին, որ նման արարքները անարձագանք չեն մնում, և առիթի դեպքում պատասխանը չի ուշանում: Կարևոր չէ` Սերժ Սարգսյանը քնա՞ծ էր, թե՞ կարդում էր:

Ճիշտն ասած, քնելն էլ վերաբերմունք է կատարվող իրադարձությանը, և կարելի է հարցն այդպես էլ ներկայացնել, բայց նման առիթ, անկասկած, իր ձեռքից բաց չէր թողնի ոչ պաշտոնական Բելառուսը:

Բնականաբար, Բատկան, ում երկրում «ծիտն իր թեւով, օձն իր պորտով չի անցնում» առանց նրա գիտության, հնարավոր չէ` մոռացության մատներ ամիսներ առաջ Հայաստանում իր գլխին եկածը: Իսկ որ այդ տեսանյութի հետ կապված զեկույցը Լուկաշենկոյին ամենայն մանրամասնորեն էր ներկայացված, երևում է պատասխանից: Սերժ Սարգսյանի քնած լինելու մասին կադրերը ոչ թե ցուցադրվեցին Բելառուսի հանրային հեռուստաընկերությամբ, այլ մասնավոր մի ալիքով, որի վրա իբր ազդեցություն չունի երկրի նախագահը, համարյա ճիշտ այնպես, ինչպես Հայաստանում: Դիտեք կադրերը և կհամոզվեք:

Մնում է, որ այստեղ համապատասխան կառույցները, որոնք իբր խիստ զբաղված են Սերժ Սարգսյանի PR-ով և հայկական ԶԼՄ-ների մոդերատորությամբ, հասկանան, որ այն բոլոր մանիպուլյացիաները, որ ընդունում կամ հանդուրժում է ժողովուրդը, մյուսները կուլ չեն տա: Պատվի հարց է: