Ինչո՞ւ օգտվենք Թուրքիայից բերված սննդամթերքից, երբ մեր գյուղացին սոված է

Բոլորս էլ գիտենք, թե թույնի ինչ տեսակներ կան, որոնք կարող են երկարաժամկետ լինել եւ ուշ արտահայտվել: ՛՛Ես անձնապես դեմ եմ հենց Թուրքիայից բերված ապրանքներին՛՛.- լրագրողների հետ հանդիպման ժամանակ, անդրադառնալով գյուղատնտեսության նախարար Սերգո Կարապետյանի այն որոշմանը, որի համաձայն` թույլատրվում է Ադրբեջանից եւ Թուրքիայից սննդամթերքի ներմուծումը Հայաստան, նման տեսակետ հայտնեց կինոռեժիսոր Արշակ Զաքարյանը:

Նա նշեց նաեւ, որ գյուղնախարարի որոշումն իր հետ բազմաթիվ վտանգներ է բերելու: Զաքարյանը զարմացած է` ինչո՞ւ պետք է օգտվենք Թուրքիայից բերված սննդամթերքից, երբ մեր գյուղացին սոված է:

«Սակայն, մյուս կողմից, այս ընթացքում Թուրքիայից ներկրվել են տարբեր աննդամթերքներ՝ լոլիկ, խմորեղեն, մակարոնեղեն. իբրեւ թե արգելվա՞ծ էր, հիմա էլ թողե՞լ են: Կարծում եմ` պետությունը պետք է արգելի նման որոշման` կյանքի կոչվելը: Գնալ Թուրքիա, առեւտուր անել ու հարստացնել թշնամուն, ով այդ փողերը հետագայում օգտագործում է մեր դեմ, ուղղակի անընդունելի է»,-ասաց Զաքարյանը: