Մաքսային միությունում մեզ սպասվում է ռուբլու գոտի. Հրանտ Բագրատյան

Սերժ Սարգսյանը պետք է համարձակություն հավաքի և  Հայաստանում հանրաքվե անցկացնի` պարզելու` արդյո՞ք ժողովուրդը ցանկանում է  անդամակցել  Մաքսային միությանը, ապա նոր  ծրագրի հաջորդ քայլերը. լրագրողների հետ հանդիպման ժամանակ ասաց Հրանտ Բագրատյանը:

Նրա խոսքով` ինքն այս ամենը կանխորոշել էր, սակայն չէր սպասում, որ Հայաստանն այս քայլին կգնար խայտառակ ձևով` հիասթափեցնելով Եվրոպային:

«Ես ի՞նչ անեմ, որ կարողանում եմ կանխատեսել ավելին, քան որևէ քաղաքական գործիչ: Այս տարվա նախագահական ընտրություններին միակն եմ եղել, որ կոչ եմ արել այդ մոտեցման օգտին։ Ես սա լավ հաշվարկել էի: Մի լուծեք այդ հարցերը միանձնորեն։ Կա ժողովուրդ, ինչպես քվեարկեց` այդպես էլ կլինի։ Այլապես կա'մ վատ է լինելու,  կա'մ էլ խայտառակվելու ենք: Ես փետրվարին ասում էի` եկեք զբաղվենք երկրով, ես ոչ հաճոյախոսել եմ եվրոպացիներին, ոչ էլ` ռուսներին, ես միայն պարզապես գիտեմ մեր երկրի  շահը»,- ասաց նա:

Ըստ Բագրատյանի`  այդ որոշումն ընդունելիս ոչ մի ճնշում չի եղել ռուսների կողմից. «Ռուսները լուռ հետևում էին, իսկ մերոնք Եվրոպայում տնտեսական հաճույքներ էին վայելում` մոռանալով, որ մեզ մոտ ռուսական բազա կա: Դրա համար էլ Պուտինը կանչեց, ասաց` չհասկացանք, մենք հո ձեր համբալը չենք: Այժմ մենք 50 տարով չենք կարողանա եվրոպացիների հետ հարաբերությունները վերականգնել, իսկ  ռուսների մոտ էլ տպավորություն ենք թողել, որ ցանկացած պահի կարող ենք իրենց էլ գցել»:

Բագրատյանը համարում է, որ Մաքսային միությանն անդամակցելն անհարմար պահի էր, ինչը  մեզ ընդհանրապես ձեռնտու չէր:  «Մեզ Մաքսային միություն պետք չէ, այնտեղ զարգացման հեռանկարները քիչ են»,- ասաց նա և հավելեց, որ Մաքսային միությունում  մեզ սպասվում է  ռուբլու գոտի: «Մենք հայտնվել ենք մի տարածքում, որտեղ 4 անգամ տարիֆները պետք է բարձրացնեն:  Գտնվել մի միության մեջ, որտեղ երեք պետություններ  էներգակիր ներմուծողներ են, նշանակում է փակել հանրապետության տնտեսությունը»,- նշեց բանախոսը:

Որպես հարցի լուծում` նախկին վարչապետն առաջարկում է`  ՄՄ-ին անդամակցելուց հետո  ստեղծել լուրջ հանձնաժողով , որը կքննարկի, թե ինչպես, օրինակ, չեզոքացնել էներգակիրների բացասական էֆեկտը: Բացի այդ` ժամկետ խնդրել միությունից` մեր տնտեսությունը միությանն անդամ մյուս պետությունների տնտեսություններին հարմարեցնելու  համար:  

Բագրատյանը նաև կատակում է. «Մաքսային միությանն անդամակցելուց հետո մեր երկրի կուսակցությունները  լրջորեն պետք է ուսումնասիրեն «Եդինայա Ռոսիա» կուսակցության կանոնադրությունն ու  ծրագրերը»:

Սակայն, ըստ նրա,  ՄՄ-ին միանալը դրական կողմ էլ ունի. «Կարող է կոնյակի և գինու արտադրությունը ծաղկել»: