Ի՞նչ ա, պետք ա՞ նախագահն ամեն միտինգավորի աչոտ տա՞ր. Շմայս

ԱԺ ՀՀԿ խմբակցության պատգամավոր Առաքել Մովսիսյանը (Շմայս) չի հասկանում, թե ինչու են մարդիկ բողոքում Մաքսային միությանն անդամակցելու` Սերժ Սարգսյանի որոշման դեմ:

«Հարյուր տարի ա` ռուսի հետ ապրել ենք, ինչի՞ են բողոքում Մաքսային միության դեմ»,- Yerkir.am-ի հետ զրույցում իր զարմանքն ու զայրույթը չթաքցրեց ՀՀԿ-ական պատգամավորը, հետո ինքն իր հարցին պատասխանեց. «Ի՞նչ ա` ուզում էին էթայինք, ճակատներիս թուրք կամ թուրքի լամուկ գրեինք, մտնեինք թուրքի տակը: Հարյուր տարի ա` ռուսի հետ ենք ապրել, բա էս Արցախյան պատերազմը ռուսը չօգներ, ինչո՞վ էինք հաղթելու: Ռուսից առանձնանալու ուրիշ ճամփա մենք ունե՞նք: Միանշանակ` ոչ: Ես շատ գերազանց եմ գնահատում այս կարգավիճակը»:

Մեր դիտարկմանը, թե բողոքողները պնդում են, որ, Մաքսային միություն մտնելով, մենք հայտնվում ենք Ռուսաստանի կրունկի տակ, ՀՀԿ-ական պատգամավորը պատասխանեց, որ «ավելի լավ է ռուսի հետ լինենք ու մի աստիճան ցածր լինենք, քան թե թուրքի լամուկը դառնանք, այլ ճանապարհ չկա»:

ՀՀԿ-ական պատգամավորը վստահ է, որ այսօրվա բողոքողները «խելքի կգան», հետո չեն ասի` դեպի Եվրոպա գնանք: «Եվրոպան ի՞նչ ա տվել մեզ»,- հարցրեց պատգամավորը:

Դիտարկմանը, որ դժգոհություն է հարուցել նաեւ այն, որ նախագահն անակնկալ կերպով նման հայտարարություն արեց, ՀՀԿ-ական պատգամավորը հակադարձեց. «Անակնկալ չի, ինչ ա: Պետք ա նախագահն ամեն միտինգավորի աչո՞տ տար: Դա չի լինի: Նախագահն ունի թիմ, անվտանգություն խորհուրդ, կառավարություն, եւ ես վստահ եմ, որ այդ ամեն ինչը համատեղ որոշված` նոր գնացել ա»:

Հարցին, թե ստացվում է, օրինակ, ինքը տեղյա՞կ է եղել, պատգամավորը պատասխանեց, որ «ամեն գաղտնիք չէ, որ պետք է ասեն»:

ՀՀԿ-ական պատգամավորը վստահեցրեց նաեւ, որ Մաքսային միությանն անդամակցելու առաջին առավելությունն այն է, որ խուսափում ենք պատերազմից: «Կարեւորը այն է, որ եթե Արցախյան հարցը լուծում ունի, միանշանակ միակողմանի կլինի ու մեր օգտին: Եթե պատերազմ եղավ, ռուսն ինքնըստինքյան մեր կողմն ա ներքաշվելու, ի օգուտ մեզ ա գործելու, որովհետեւ մեր նեղ պահին իրանք հասել են: Վստահ եղեք, եթե ռուսը չհասնի, որեւէ Եվրոպա չի հասնի կյանքում: Եվրոպա, Եվրոպա…Առաջին անգամ տասը տարի առաջ եմ զգացել Եվրոպան ինչ բան ա»,- նշեց պատգամավորը: