Շոգ ա, ջուր են շփել, ի՞նչ անենք. Շմայս

ԱԺ պատգամավոր Առաքել Մովսիսյանն այսօր խորհրդարանում լրագրողների հետ զրույցում ասաց, թե ինքը չի հետևել Բաղրամյան պողոտայում տեղի ունեցած դեպքերին և բռնություններին: Միևնույն ժամանակ, նա վստահություն հայտնեց, որ փոխոստիկանապետ Լևոն Երանոսյանը չէր կարող բռնություն կիրառելու հրահանգ տալ և լրագրողներ ծեծել:

«Ես չեմ տեսել, չեմ հավատում` Երանոսյան Լյովան տենց բան անի: Կարող ա` մի անհատ իրան լավ չի պահել, հակաօրինական բան ա արել, իսկ դուք ամբողջը վերագրում եք ժողովրդին: Կարող ա` մի հոգի ինադու սարքել ա, որ մասսաներին հանի»,- նշեց նա:

Մեր այն դիտարկմանը, թե ցուցարարների շարքերում քաղաքացիական հագուստով ոստիկաններ կային, ովքեր սադրում էին, պատգամավորն արձագանքեց. «Բայց կարող ա` իրենք սարքած լինեն իրար մեջ, ոստիկան չլինեն, պրովոկացիա անեն, խի՞ դա հաշվի չեք առնում»:

Հարցին, թե պայքարին դե՞մ է, պատասխանեց. «Բոլորն էլ իրավունք ունեն պայքարելու: Ամեն մի հայ իրավունք ունի իր կարծիքը հայտնելու: Ես կողմ եմ: Բայց ի՞նչ գիտեք` ով է հարձակվել: Ի՞նչ գիտեք` ոստիկաններն են պրովոկացիա արել»:

Պատգամավորը անդրադարձավ նաև ջրցան մեքենաներ կիրառելուն` նշելով. «Շոգ ա, ջուր են շփել, ի՞նչ անենք»:

Հիշեցնենք, որ այս գիշեր Բաղրամյան պողոտայում ոստիկանների կիրառած գործողությունների արդյունքում վիրավորվել են քաղաքացիներ և լրագրողներ: Իր պահվածքով աչքի է ընկել փոխոստիկանապետ Լեւոն Երանոսյանը: