Խի, ադրբեջանցի մարզիկը պիտի աչոտ տա՞. սամբոյի ֆեդերացիայի նախագահի զավեշտալի հայտարարությունները

Արդեն հայտնել ենք, որ սամբոյի աշխարհի գավաթի խաղարկությունում աշխարհի գավաթը նվաճած Աշոտ Դանիելյանի պարգևատրության արարողության ժամանակ` Հայաստանի օրհենրգը հնչելու պահին, 3-րդ տեղը գրաված ադրբեջանցի մարզիկը կքանստել է: Այս առիթով Yerkir.am-ը զրուցեց Հայաստանի սամբոյի ֆեդերացիայի նախագահ Լևոն Հայրապետյանի հետ:

-«Ինչպե՞ս կմեկնաբանեք ադրբեջանցի մարզիկի նման վարքը» հարցին, նա պատասխանեց. «Մեկնաբանելու կարիք անգամ չկա: Դա իրենց իրավունքն է: Ինչո՞ւ ենք մենք մեծ ուշադրություն դարձնում նման բաներին, չգիտեմ: Ես տրիբունայում էի և այնքան էի տարված մեր հիմնով ու դրոշով, ուրախության և ապրումների մեջ նայում էի Աշոտ Դանիելյանին, որ անգամ ուշադրություն չէի դարձրել: Իհարկե, նկատեցի, որ մարզիկը կքանստած է, բայց իմ մտքով էլ չանցավ, որ ադրբեջանցի է: Արտառոց ոչինչ չկա, նույն կերպ կարող էր վարվել և հայ մարզիկը: Եթե մենք համարում ենք, որ նրանք մեզ թշնամի են, և նրանք էլ մեզ են նույն կերպ ընդունում, ապա կարելի է ենթադրել, որ կարող էր և հայ մարզիկն այդպես վարվել: Ես ոչ մի արտառոց բան չեմ տեսնում: Մենք չենք կարող ինչ-որ մեկից պահանջել, որ սիրեն մեզ: Միջազգային սպորտում մենք պետք է զիջումների գնանք և հասնենք փոխադարձ հարգանքի»:

Իսկ հարցին, թե ադրբեջանցի մարզի՞կն ինչպես է մեկնաբանել իր վարքը, Հայրապետյանը պատասխանեց. «Խի, պիտի աչոտ տա՞»: Ըստ մեր զրուցակցի` նա մոտեցել է Աշոտին, ներողություն խնդրել ու ասել, որ չէր ուզում էկրանին երևալ: «Նույն մարզիկն ինձ էլ է մոտեցել` իր մարզիչի հետ, և ես ասել եմ` ոչ մի արտառոց բան չկա»,- ասաց Հայրապետյանը:

Հետաքրքվեցինք` Հայաստանի սամբոյի ֆեդերացիան բողոք կներկայացնի՞ միջազգային ֆեդերացիային: «Չեմ պատրաստվում բողոք ներկայացնել միջազգային ֆեդերացիա: Ես դեմ եմ նման բաներին: Մեր կանոնակարգում նման բան չկա: Կա էթիկայի հանձնաժողով: Մեր ֆեդերացիան կարող է գրավոր բողոք ներկայացնել, որից հետո պետք է քննարկեն և պատասխանեն: Բայց մենք դրա կարիքը չունենք: Բողոքելու ոչինչ չկա: Հնարավոր է` այդ պահին ադրբեջանցու փորը ցավել է: Ադրբեջանի դեսպանի տեղակալն ինձ մոտեցավ և ասաց, որ աշխատանք կտանի այդ մարզիկի հետ: Առանց խոսքի մենք հասկացել ենք իրար: Դեպք է, պատահել է,- ասաց Հայրապետյանը:

Խոսելով Բաքվի Եվրոպական խաղերին հայ մարզիկների մասնակցության մասին` նա նշեց. «Չեղած տեղից պետք է խնդիրնե՞ր ստեղծենք: Մեզ ավելորդ խնդիրներ պետք չեն: Թեկուզև պատերազմի մեջ ենք այդ երկրի հետ, բայց պետք է ձգտենք խաղաղության, որ օրեցօր մեր հարաբերությունները լավանան: Դրա համար ամենահարմար միջոցը սպորտն է»: