Հայաստանը մոտ է ծերացող երկիր դառնալուն

ՄԱԿ-ի կանխատեսումներով` մինչև 2050 թվականըը մեր մոլորակում կապրի 7.9-10.9 միլիարդ մարդ, ինչը որոշակիորեն կախված է ընտանիքի պլանավորման քաղաքականության արդյունավետությունից: Սակայն զարգացող երկրներում բնակչության էական աճի դեպքում ԱՊՀ որոշ երկրներ հակառակ միտում են ցուցադրում:

Ազգաբնակչության համաշխարհային օրվա` հուլիսի 11-ի նախաշեմին  ԱՊՀ երկրների ժողովրդագրական իրավիճակի վերաբերյալ տեսակամրջի ընթացքում իրենց երկրների ժողովրդագրական խնդիրները ներկայացրեցին  հայաստանցի, մոլդովացի, ուկրաինացի, ռուսաստանցի և ղազախստանցի փորձագետները:

Այս երկրների շարքում ծնելիության նվազման և արտագաղթի ցուցանիշներով առաջին տեղը զբաղեցնող Հայաստանի  ժողովրդագրական խնդիրները ներկայացրեց  ՀՀ ԳԱԱ  փիլիսոփայության, սոցիոլոգիայի և իրավունքի ինստիտուտի տնօրեն, պրոֆեսոր Գևորգ Պողոսյանը:   

Ըստ նրա`  ՄԱԿ-ի կանխատեսումները միշտ չէ, որ ճիշտ են լինում. «Ընդհանուր առմամբ, բնակչության նվազման միտումը բնորոշ է շատ երկրների, մասնավորապես` Արևմտյան Եվրոպային, ԱՊՀ-ին:  Հայաստանում իրավիճակը նույնն է, ինչ մնացած երկրներում, միայն այն տարբերությամբ, որ ՀՀ ազգաբնակչության թիվը 3 մլն է կազմում և մեզ համար 1.5,  1 և նույնիսկ 0.5 մլն-ի կորուստը բավականին լուրջ հետևանքներ կունենա»:

Փորձագետի կարծիքով` մեր երկրում բնակչության թվի նվազումը  միգրացիոն մեծ հոսքի  և ծնելիության անկման հետևանք է:

Անդրադառնալով  ազգաբնակչության ծերացման խնդրին` Պողոսյանն ասաց. «Այն երկրները, որտեղ ազգաբնակչության 12 տոկոսից ավելին 60 տարեկան է, համարվում են ծերացող երկրներ: Հայաստանում այդ ցուցանիշը կազմում է 14,6 տոկոս, և մենք հետզհետե մոտենում ենք  ծերացող երկրների շարքին»:

Բացի այդ, ըստ նրա, ժողովրդագրությունը մեզ  համար ունի նաև քաղաքական նշանակություն, քանի որ այն երկրի անվտանգության, ինչպես նաև  տնտեսության զարգացման երաշխիքն է: «Մանավանդ` եթե հաշվի առնենք, որ մեկնողների մեծ մասը տղամարդիկ են, որոնք ազգաբնակրչության տնտեսական ակտիվ շերտն են կազմում»,- եզրափակելով միտքը` հայտարարեց նա: