Տարոնը դեռ քեֆեր է անում

Երեւանի ավագանու ընտրության եւ Տարոն Մարգարյանի քաղաքապետ դառնալու առիթով ՀՀԿ քեֆերի կասկադը դեռ շարունակվում է:

Երեկ Նոր Նորքի զանգվածի «քեֆի» հերթն էր, որին մասնակցում էր նաեւ Սերժ Սարգսյանը: Քեֆի «պատասխանատուները» «Հրապարակ»-ին հպարտությամբ նշել են, որ դա առաջին վարչական շրջանի խնջույքն է, որին իր մասնակցությամբ պատվում էր Սերժ Սարգսյանը:

Ի դեպ, ՀՀԿ Գործադիր մարմնի նիստը հետաձգվել է եւ այսօրվա փոխարեն տեղի կունենա վաղը, ժամը յոթին: Կարո՞ղ է էն պատմության հանգույն, երբ քյավառցին նամակ է գրում Երեւանում սովորող իր որդուն, թե` «բալա ջան, եթե ուսումդ խմելուդ կխանգարա, ուսումդ թող», այսօր էլ քեֆ ունեք, դրա համար ԳՄ չեք անում, հարցրել են ՀՀԿ պատասխանատուներից մեկին:

«Ոչ, տեխնիկական պատճառներով է ԳՄ նիստը տեղափոխվել ուրբաթ: Որպես այդպիսին, ԳՄ նիստը ֆիքսված օր չունի. շաբաթվա որ օրը հարմար ենք գտնում, այն օրն էլ անում ենք»: