Գետահովիտի գյուղացիներին վախեցրել են

Համահայկական բնապահպանական ճակատի (ՀԲՃ) անդամներ Լևոն Գալստյանը, Տիգրան Զարիկյանը և Անի Նավասարդյանն այսօր լրագրողների հետ հանդիպման ժամանակ ներկայացրեցին  Տավուշի մարզի Գետահովիտ գյուղի «Խաչաղբյուր-2» փոքր ՀԷԿ-ի կառուցման ընթացքում արձանագրված խախտումները:

Լևոն Գալստյանի խոսքով` ՀԷԿ-ի կառուցման տարածքում  որևէ  տեսչական ստուգում չի անցկացվել:  Դեռևս 4 ամիս առաջ ապօրինի ՀԷԿ կառուցելու վերաբերյալ  հաղորդում են ներկայացրել ՀՀ  ոստիկանություն և դատախազություն, սակայն առ այսօր  որևէ պատասխան չեն ստացել: 

«Ոստիկանությունը չի  կարողացել հասկանալ` կա՞, արդյոք, քրեական տարր, թե՞ ոչ»,- ասաց նա և հավելեց, որ այն գյուղացիները, ովքեր ամիսներ առաջ բողոքում էին ՀԷԿ-ի կառուցման դեմ, այսօր վախենում են խոսել:

Ըստ Գալստյանի` գյուղապետը գրություն է ներկայացրել, ըստ  որի` գյուղապետարանը դրական  եզրակցություն է տվել ՀԷԿ-ի կառուցմանը` հայտնելով, որ գյուղի բնակիչները հիմնականում համաձայն են: Սակայն  գյուղապետը դեռևս  հանրային լսումների ժամանակ հայտնել էր, որ գյուղի 99 %-ը դեմ է ՀԷԿ-ի կառուցմանը:

Տիգրան Զարիկյանի խոսքով էլ`  ճնշումներ  են գործադրել գյուղացիների  վրա: «Ինչ-ինչ ձևով կարողացել էին ազդել մարդկանց վրա, նրանք վախենում էին խոսել»,- ասաց նա և հավելեց, որ  ճնշումներ են գործադրել նաև իրենց նկատմամբ: 

Նշենք, որ մայիսի 28-ին Կանաչ ջոկատն այցելել էր Գետահովիտ գյուղ` պարզելու, թե  ինչ աշխատանքներ են կատարվում Խաչաղբյուր գետի վրա` Իջևանի արգելավայրի տարածքում կառուցվող 2-րդ փոքր ՀԷԿ-ում, ինչպես նաև ճշտելու գյուղացիների կարծիքը:

ՀԲՃ անդամները մտադիր են համապատասխան առաջարկներով երկրորդ անգամ դիմել ՀՀ կառավարություն: