″Թանգարանային գիշեր″-ի շրջանակներում կցուցադրվեն հայկական տարազներ

Մայիսի 18-ին` «Թանգարանային գիշեր» ծրագրի շրջանակներում, Երևան քաղաքի պատմության թանգարանում տեղի կունենա նկարչուհի Ֆլորա Գրիգորյանի «Հայկական ազգային տարազ» եռալեզու ալբոմի շնորհանդեսը և տարազների ցուցահանդեսը:

Ցուցադրության շրջանակում կներկայացվեն Հայաստանի բոլոր պատմաազգագրական շրջանների, հայկական գաղթօջախների 18-20-րդ դարերի հայ հասարակության տարբեր խավերի ազգային տարազները:

Ֆլորա Գրիգորյանի «Հայկական ազգային տարազ» պատկերագրքի շնորհանդես-ցուցահանդեսի նպատակն է ներկայացնել ազգային տարազը, նորովի մեկնաբանել և վերլուծել հայ տարազարվեստի բազմազանությունն ու ինքնատիպությունը, խթանել հագուստի դիզայնի ոլորտում ազգային բրենդի ստեղծմանը, տարազի պատրաստման հետ կապված մոռացված տնայնագործական արհեստների ու տեխնիկաների վերականգնմանը:

Ցուցահանդեսի ընթացքում կցուցադրվեն նաև նկարչուհի Կարինե Պետրոսյանի պատրաստած ազգային տարազները:

Ցուցահանդեսը կգործի մինչև 2013 թ. մայիսի 28-ը: