Գծատերերը չեն քշում

Ավելի քան մեկ շաբաթ է, ինչ Արմավիրի մարզի սահմանամերձ Բագարան և Երվանդաշատ համայնքները չունեն համապատասխան տրանսպորտի միջոց, որով կկարողանան գնալ Արմավիր քաղաք և վերադառնալ: Այս մասին «Ժողովուրդ»-ը տեղեկացել է նշված համայնքների բնակիչներից:

Արմավիրի մարզպետ Աշոտ Ղահրամանյանից թերթը հետաքրքրվել է, թե այս ուղղությամբ ինչ քայլեր է ձեռնարկում:

«Եթե ձեզ թվում է, որ դուք շատ եք շահագրգռված, ապա չարաչար սխալվում եք: Արդեն որերորդ ամիսն է՝ այդ գծատերը հրաժարվում է գիծը սպասարկելուց, որովհետև շահույթ չի ստանում: Հիմա էլ ասում է, որ էլ չի շարունակելու: Մենք էլ նոր մրցույթ կհայտարարենք: Եթե որևէ մեկը կցանկանա, ապա կարող է մասնակցել մրցույթին»-ասել է մարզպետը:

Թերթի թղթակցի հարցին, թե ինչու մինչ օրս չի հայտարարվել մրցույթը, նա վրդովված պատասխանել է. «Դիմեք մարզպետարանի լրատվական ծառայություն, կպատասխանեն» ու անջատել հեռախոսը: Ի դեպ, Ղահրամանյանը պարբերաբար այցելում է նշված համայնքներ՝ Արաքս գետում ձկնորսության: