Տրանսպորտի գծատերերը ուղեվարձը չբարձրացնելու «տեղ ունեն»

ԵԱՏՄ մտնելուց հետո հայ սպառողը միայն տուժել է, դեռ որևէ օգուտ չենք տեսել. լրագրողների հետ հանդիպման ժամանակ կարծիք հայտնեց Սպառողների խորհրդատվություն կենտրոնի նախագահ Կարեն Չիլինգարյանը: Ըստ նրա` վերջին շրջանի թանկացումները մեր՝ ԵԱՏՄ անդամ լինելու հետևանքով է:

Չիլինգարյանի հավաստմամբ՝ առաջիկայում էլի կլինեն թանկացումներ: «Դիզվառելիքը, լիցքավորվող գազը թանկացել են, և դեռ էլի կթանկանա: Մեր տրանսպորտը մեծ մասամբ հենց լիցքավորվող գազով է գործում, և այն ապրանքները, որոնք տեղափոխվում են մեքենաներով, բնականաբար, նույնպես կթանկանան: Ինչ վերաբերում է տրանսպորտի թանկացմանը, ապա, օրինակ, մեր հարևան Վրաստանում տրանսպորտի սակագինն ավելի էժան է, քան մեզ մոտ: Այսինքն՝ սա հիմք է տալիս մտածելու, որ մեր գծատերերը ուղեվարձը չբարձրացնելու«տեղ ունեն»»,- ասաց նա:

Տրանսպորտի ուղեվարձի չբարձրացման հույսի փոխարեն, ըստ Չիլինգարյանի, սպասվում է երրորդ երկրներից Հայաստան ներմուծվող ավտոմեքենաների թանկացում: