Գծատերերը գերշահույթ են փորձում ստանալ. Ստյոպա Սաֆարյան

Ըստ նրա` դեռևս 2008 թվականին գծատերերի` քաղաքապետարանին ներկայացրած տվյալներում նշվում է, որ տրանսպորտը սպասարկող  ընկերություններն աշխատում են վնասով: «Այդ դեպքում ինչպես հասկանալ վնասով աշխատող ընկերության` 2012 թվականի մրցույթին դիմելը, հաղթելը և քաղաքապետարանի հետ պայմանագիր կնքելը»,- ասաց Սաֆարյանը:

Հարցին` հնարավո՞ր է, արդյոք, 100 դրամով տրանսպորտի բարձր սպասարկում ապահովել, բանախոսը պատասխանեց, որ հնարավոր է, եթե պետությունն իր  ֆինանսական միջոցները խելամտորեն տնօրինի: «Ժառանգության» ներկայացուցչի խոսքով` տարբեր հաշվարկներով` տրանսպորտի ինքնարժեքը չի գերազանցում 90 դրամը, և պարզ է, որ գծատերերը գերշահույթ են ցանկանում ունենալ:

«Բացահայտվել են նույնիսկ տվյալներ, որոնց համաձայն` տարբեր երթուղիների տերեր երկարացրել են երթուղին, նոր փողոցներ են ավելացրել` այդ գերշահույթն ունենալու համար»,- ասաց նա  և հավելեց. «Տրասպորտային բարեփոխումներ, անշուշտ, պետք են, սակայն դրանք պետք է սկսել ոչ թե սակագնի բարձրացումից, այլ ոլորտը բարեխիղճ պաշտոնյաների և աշխատողների վստահելով»: