Ինձ ճիշտ չեն հասկացել. Հենրիխ Մխիթարյան

Yerkir.am-ը տեղեկացրել էր, որ Հայաստան-Չեխիա խաղից առաջ Հայաստանի ազգային հավաքականի ֆուտբոլիստներ Յուրա Մովսիսյանը, Հենրիխ Մխիթարյանն ու Ռոման Բերեզովսկին այցելել են Տնտեսագիտական համալսարան:

Ուսանողների հետ հանդիպման ընթացքում Հենրիխ Մխիթարյանի կողմից հնչեցված խոսքերը, թե կանի ամեն ինչ, որպեսզի այս ամռանը տեղափոխվի աշխարհի ուժեղագույն ակումբներից մեկը, պարզվում է, սխալ է ընկալվել հասարակության կողմից:

«Շախտյորի» լրատվական բաժինն այս կապակցությամբ մեկնաբանություն է խնդրել Մխիթարյանից, ինչին ի պատասխան նա ասել է. «Ես «Շախտյորի» խաղացող եմ և շատ ուրախ եմ դրա համար: Ես պայմանագիր ունեմ ակումբի հետ մինչև 2015թ.: Եղել է  սովորական հանդիպում, շփում ուսանողների հետ: Նրանք ինձ հարցեր էին տալիս, թերևս` կատակով, ես էլ պատասխանում էի դրանց: Ինձ ճիշտ չեն հասկացել և սխալ են մեկնաբանել»: