Ֆինանսների նախարարին ճիշտ չեն հասկացել

Հոկտեմբերի  26-ին Ազգային ժողովում լրատվամիջոցների ներկայացուցիչները հետաքրքրվել են ՀՀ Ֆինանսների նախարար Վարդան Արամյանից,  թե ի՞նչ է պատրաստվում անել նախարարությունը` իրեն պատկանոց Դիլիջանի ուսումնական կենտրոնի հետ և արդյոք պատրաստվու՞մ է այն վաճառել. տեղեկացնում է ՀՀ Ֆինանսների նախարարության մամուլի քարտուղար Լուսինե Մկրտչյանը։
Ի պատասխան՝ Ֆինանսների նախարարը տեղեկացրել է. «քանի որ նախարարության ենթակայության տակ գտնվող ուսումնական կենտրոնը հանդիսանում է ՊՈԱԿ, հետևաբար այն չենք կարող վաճառել, սակայն  ՊՈԱԿ-ը վերաիմաստավորել, այդ թվում նաև լուծարել՝  քննարկվում է»:  

Հետագայում,  լրատվամիջոցները ասվածը վերագրել են Դիլիջանի ուսումնական կենտրոնին, որը ներկայումս չի գտնվում ՀՀ  Ֆինանսների նախարարության ենթակայության ներքո: Դիլիջանի հիշյալ կենտրոնը եղել է ՀՀ Ֆինանսների նախարարության ենթակայության տակ միայն այն ժամանակահատվածում, երբ ՊԵԿ-ը միացված է եղել նախարարությանը: Կառույցների տարանջատման արդյունքում՝  Դիլիջանի ուսումնական կենտրոնը ՊԵԿ –ին պատկանող այլ գույքի հետ միասին 2016 թվականի մարտի 17-ի  կառավարության N 329-Ն որոշմամբ վերադարձվել է ՊԵԿ-ին :

Հետևաբար ակնհայտ  է, որ Ֆինանսների նախարար Վարդան Արամյանը, խոսելով ուսումնական կենտրոնի մասին, չէր կարող խոսել այլ գերատեսչությանը պատկանող ուսումնական կենտրոնից և բոլոր մեկնաբանությունները տրվել են ներկայումս գործող  ՀՀ  ֆինանսների նախարարության ուսումնական կենտրոն ՊՈԱԿ-ի վերաբերյալ: 

Պարզաբանման կարիք ունի նաև զրույցի ԾԻԳ-երին վերաբերող հատվածը , որտեղ ևս թյուրըմռնում է տեղի ունեցել: Ծրագրեր իրականացնող թվով 13 գործակալությունները բոլորը վերագրվել են ՀՀ Ֆինանսների նախարարությանը, մինչդեռ դրանք գործում են ՀՀ կառավարության ներքո :