Չակ Հեյգելը եւս մեկ քայլ է արել դեպի Պենտագոնի ղեկավարի պաշտոնը

ԱՄՆ Սենատի հանձնաժողովը ձայների 14 կողմ եւ 11 դեմ հարաբերակցությամբ երկրի պաշտպանության նախարարի պաշտոնում հաստատել է Չակ Հեյգելի թեկնածությունը` նրան մեկ քայլով մոտեցնելով վերջնական նշանակմանը. տեղեկացնում է  Fox News-ը:

Նեբրասկա նահանգից նախկին սենատորին դեմ են եղել նրա կուսակիցները` հանրապետականները: Խորհրդարանականները, ովքեր կողմ են Հեյգելի թեկնածությանը, համարում են, որ նա մեծ վաստակ է ունեցել վիետնամական պատերազմում: Իսկ ընդդիմախոսները վկայակոչում են նրա վիճելի հայտարարությունները Իրանի եւ Իսրայելի, Իրաքի պատերազմի եւ ահաբեկչական խմբավորումների մասին:

Ի դեպ, yerkir.am-ը տեղեկացրել էր, որ ԱՄՆ Հայ Դատի հանձնախումբը լրջորեն մտահոգված է ԱՄՆ պաշտպանության նախարարի թեկնածու Չակ Հեյգելի` Հայոց ցեղասպանության հարցում ունեցած դիրքորոշումից:

«Մեզ անհանգստացնում է այն հանգամանքը, որ նախկին սենատոր Հեյգելը հավատում է Հայոց ցեղասպանության վերաբերյալ Թուրքիայի ստահոդ հայտարարություններին»,- ասել է Հայ Դատի գրասենյակի գործադիր տնօրեն Արամ Համբարյանը:

Հեյգելը դեմ է Հայոց ցեղասպանության ճանաչմանը եւ 1915 թվականի ողբերգություն ցեղասպանություն չի համարում: