Տարածաշրջանային լարվածությունը Հայաստանի շահերից չի բխում

Մեր տարածաշրջանում լարվածությունը մեծացել է, եւ դա, ցավոք, Հայաստանի համար ամենեւին էլ բարեպաստ չէ. լրագրողներին այսօր հայտնեց «Մոդուս Վիվենդի» կենտրոնի տնօրեն Արա Պապյանը:

Առաջին հերթին` նա նշեց, որ Թուրքիայում հակահայկական միտումներն ակնհայտորեն ավելացել են: Դա երեւում է հայերի նկատմամբ կիրառված բռնություններից: Պապյանը կարծիք հայտնեց, որ մինչեւ 2015 թվականը Թուրքիայում հակահայկական տրամադրություններն ավելանալու են, ինչը մեզ համար խնդիրներ է առաջացնելու: Հետեւաբար, որեւէ բարելավում հայ-թուրքական միջպետական եւ միջազգային հարաբերություններում նա չի տեսնում:

Արա Պապյանը անդրադարձավ Իրանին եւս, որտեղ հունիսի 14-ին նախատեսվում են նախագահական ընտրություններ: Եթե նախորդ խորհրդարանական ընտրությունների ժամանակ ներքաղաքական անհնազանդություններ տեղի ունեցան, ապա գալիք ընտրություններում նման դեպքեր նույնպես ակնկալվում են: Արա Պապյանը նշեց նաեւ, որ Իրանի վրա ամերիկյան ազդեցությունը փոքրանում է, ինչը մեզ համար լավ է, բայց պետք է հաշվի առնել, որ այնտեղ եւս լարվածությունը կմեծանա:

Մեր հաջորդ հարեւանը Վրաստանն է, որտեղ նոր ընտրություններ տեղի ունեցան, եւ այնտեղ էլ առկա է անկայուն` երկիշխանության վիճակ, եւ ինչպես նշեց բանախոսը, կանխատեսելի չէ, թե ինչ զարգացումներ տեղի կունենան, որովհետեւ երկու կողմերն էլ լուրջ են տրամադրված:

Մեզ համար ամենակարեւորը ադրբեջանական զարգացումներն են: Այնտեղ էլ կարեւոր զարգացումներ կան, մասնավորապես` Իսմայիլըի զարգացումները, որտեղ ժողովրդական ընդվզում տեղի ունեցավ: Արա Պապյանը ասաց, որ այդ շրջանը հիմնականում լեզգիաբնակ է, եւ այստեղ սոցիալ-տնտեսական զարգացումները նաեւ ազգային բնույթ ունեն: Սա մեզ համար մի կողմից լավ է, որովհետեւ ադրբեջանական իշխանություններն իրենց ներքին խնդիրներով կզբաղվեն, բայց մյուս կողմից` նաեւ վտանգավոր, քանի որ փորձը ցույց է տալիս, որ Ադրբեջանի պես երկրներում հաճախ ներքին խնդիրները լուծելու համար ձեռնարկում են փոքրիկ, անարյուն պատերազմներ, իսկ դա կարող է նաեւ անցանկալի, արյունոտ հետեւանք ունենալ ոչ միայն մեզ, այլեւ հենց Ադրբեջանի համար:

Սակայն, ըստ Արա Պապյանի, հայ-ադրբեջանական հարաբերություններում մի գործոն եւս կա, որն ավելացնում է լարվածությունը մեր երկու երկրների միջեւ` Ստեփանակերտի օդանավակայանի շահագործման հարցը: Պատային իրավիճակ է ստեղծվել այդ հարցում: Ասել է թե` կողմերից յուրաքանչյուրը, համապատասխան հայտարարություն անելով, պարտավորություն է ստանձնել իր հայտարարությունը կյանքի կոչել, եւ յուրաքանչյուրի հրաժարումն իր հայտարարությունից անպատվաբեր կլինի ոչ միայն սեփական ժողովրդի առջեւ, այլեւ համաշխարհային հարաբերություններում:

Արա Պապյանն անդրադարձավ նաեւ Հայրիկյանի հետ կատարված միջադեպին եւ ասաց, որ դա էլ, իր հերթին, բերում է լարվածության աճ Հայաստանի ներքաղաքական զարգացումներում: Բանախոսը հայտնեց իր կարծիքը Հայրիկյանի այն հայտարարության առնչությամբ, որ մահափորձը ռուսական հատուկ ծառայությունենրի ձեռքի գործն է, ու նշեց, որ իր համար ընդունելի չէ այդ տարբերակը:

Ինչ վերաբերում է Հայրիկյանի հնչեցրած ենթադրությանը` իր դեմ մահափորձը ռուսական հատուկ ծառայություններին վերագրելու մասին, Արա Պապյանը հիշեց, որ, բացի Գյումրիում Ռուսաստանի հյուպատոսից, ոչ ոք այդ կապակցությամբ որեւէ հայտարարություն չի արել ավելի բարձր մակարդակով:

Իսկ հյուպատոսը քաղաքական պաշտոն չէ, ինչը նշանակում է, որ Ռուսաստանը լուրջ չի վերաբերվում այդ հայտարարություններին: Ուստի Պապյանը կարծիք հայտնեց, թե իրեն չի թվում, որ Հայրիկյանի դեպքը լուրջ ազդեցություն կունենա հայ-ռուսական հարաբերությունների վրա: Իսկ իր անձնական պատկերացումների համաձայն` Հայրիկյանի դեմ մահափորձ կատարողներին կամ դրա պատվիրատուներին պետք է Հայաստանի ներսում փնտրել: