Կալանավայրերում ընտրություններից մեծ սպասումներ ունեն

ՀՀ ճանապարհային ոստիկանության նախկին պետ Մարգար Օհանյանը, ինչպես նաև ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանը ներման դիմումներ էին գրել Սերժ Սարգսյանին:

Տեղեկություններ կային, որ նրանք մինչև տարեվերջ ազատ կարձակվեն: Ավելի ուշ խոսակցություններ տարածվեցին, որ Ամանորից կամ նախագահական ընտրություններից առաջ Սերժ Սարգսյանը ներում է շնորհելու մի շարք անձանց, այդ թվում` վերոնշյալ երկու նախկին բարձրաստիճան պաշտոնյաներին: Առ այսօր, սակայն, հայտնի չէ նրանց դիմումների ճակատագիրը. գրում է «Հայկական ժամանակ» օրաթերթը:

Երեկ Օհանյանի փաստաբան Մկրտիչ Վասակյանը թերթին ասել է. «Ես այստեղ չէի, Նոր տարուն եմ եկել: Իր մոտ էլ երկու ամիս է չեմ գնացել, երևի եկող շաբաթ կգնամ, ինչ-որ բան կճշտեմ»:

Թերթի տեղեկություններով` կալանավայրերում բավական մեծ աժիոտաժ ու սպասումներ կան, որ նախագահական ընտրություններից առաջ Սերժ Սարգսյանը որոշ թվով անձանց պետք է ներում շնորհի: Ըստ թերթի աղբյուրների` բազմաթիվ կալանավորներ այս օրերին շտապում են ներման խնդրագրեր գրել Սերժ, Սարգսյանին, մի մասն էլ դեռ Ամանորից առաջ է գրել: