Անվտանգության ''խնդիրները'' լուծեցին

«Հայկական ժամանակը» դեկտեմբերի 11-ի համարում անդրադարձել էր Ազգային ժողովի միակ հաշմանդամություն ունեցող պատգամավորի` «Ժառանգություն» խմբակցության փորձագետ Արման Մուշեղյանի խնդրին: Թերթը հիշեցնում է, որ Արման Մուշեղյանի համար հատկապես անձրևոտ և ձմռան ցուրտ օրերին դժվար էր սայլակով ԱԺ տարածք մուտք գործել: Չկարողանալով տարածքը և շենքը հաշմանդամություն ունեցող անձանց համար լիովին մատչելի դարձնել` ԱԺ աշխատակազմը Մուշեղյանին թույլատրել էր տարածք մտնել Դեմիրճյան փողոցի մուտքով, որը, սակայն, հիմնականում ծանրաբեռնված է լինում պատգամավորների մեքենաներով:

Մուշեղյանի գրավոր դիմումը` թույլատրել մեքենայով մուտք գործել ԱԺ տարածք, բանավոր կարգով մերժվել էր` հիմնավորվելով անվտանգության հետ կապված հարցերով: Հենաշարժողական խնդիր ունեցով Արման Մուշեղյանի համար լրացուցիչ բարդություն էր սայլակով անվտանգ հասնել ԱԺ թեքահարթակին, երբ ճանապարհը սառցակալում է:

Երեկվանից Արման Մուշեղյանը հնարավորություն է ստացել տարածք մուտք գործել իր անձնական մեքենայով` միանգամից մոտենալով շենքի ետնամուտքի թեքահարթակին:

Թերթի ունեցած տեղեկություններով` ԱԺ աշխատակազմը վերանայել է նաև մնացած «արտոնյալ» պատգամավորների` մեքենաներով ելումուտը տարածք, որոնք դրա իրավունքը կանոնակարգով չունեին, բայց դա անում էին առանց որևէ պրոբլեմի: