"Անդինը" հնարավորություն կտա տեսնել քեզ՝ ինչպես որ կաս

Արդեն լույս է տեսել «Անդին» հանդեսի նախահամարը:

Հանդեսի հիմնադիր Մերուժան Տեր-Գուլանյանը լրագրողների հետ հանդիպման ժամանակ նշեց, որ «Անդինի» դռները բաց են բոլորի առջեւ՝ առանց կրոնական եւ կուսակցական պատկանելության:

«Մենք մի երկիր ենք, որն ունի հզոր անցյալ, որը, սակայն, չենք կարողանում ներկայացնել: Մենք ունենք հիանալի երիտասարդություն, որոնց նույնպես պետք է ներկայացնել եւ կրթել հայեցի հոգով, եւ եթե նույնիսկ  նրանք  ուզում են երկիրը լքել, լքելուց առաջ հայ լինելու հպարտությունն իրենց հետ տանեն»,- ասաց Տեր-Գուլանյանը:

Ամսագրի կարգախոսն է`«Բաժանորդագրվելը պատիվ է, կարդալը՝ հարստություն». ամսագրի տարեկան բաժանորդագրությունը բանակի եւ դպրոցների համար կարժենա 12 000 դրամ, իսկ մյուսների համար` 24 000 դրամ:

Yerkir.am-ի այն դիտարկմանը, թե ինչո՞վ է  պայմանավորված այն հանգամանքը, որ ամսագրի խմբագրական խորհրդում նաեւ ՀՀ ՊՆ նախարար Սեյրան Օհանյանն է ընդգրկված, Տեր-Գուլանյանը պատասխանեց, թե քանի որ իրենք շատ են անդրադառնալու բանակին, որոշեցին ՊՆ նախարարին էլ ընդգրկել խմբագրական կազմի մեջ. «Մենք լրջորեն զբաղվելու ենք` ներկայացնելով բանակի լույսն ու ստվերը»: