Այդքան կաս՝ արի քո երկիր. Էրդողանը կատարվածում մեղադրել է Գյուլենին

Թուրքիայում ռազմական հեղաշրջման փորձից հետո երկրի նախագահ Ռեջեփ Թայիփ Էրդողանն անհայտ վայրից Skype-ով կոչով դիմել էր իր քաղաքացիներին: Վերջինս հորդորել էր նրանց դուրս գալ՝ պայքարելու «ապօրինության դեմ»:

Ըստ Demokrathaber-ի՝ այս առավոտյան Էրդողանը մեկնել է Աթաթուրքի անվան օդանավակայան, որտեղից ժողովրդին ուղղված ևս մեկ կոչով է հանդես եկել:

Էրդողանը ռազմական հեղաշրջման փորձ անելու մեջ մեղադրել է իր գլխավոր հակառակորդ Ֆեթուլլահ Գյուլենին, ով այժմ բնակվում է ԱՄՆ-ում:

«Այդքան կաս՝ արի քո երկիր: Այնտեղից այս երկրում խառնաշփոթ ստեղծելու համար քո ուժը չի բավարարելու»,-ասել է Էրդողանը՝ պնդելով, որ «դրանց նմանները չեն հանդուրժում Թուրքիայի զարգացումն ու մեծացումը, ժողովրդի՝ հզորացումը»:

Վերջինս խոստացել է նաև մնալ օդանավակայանում և չհեռանալ այնտեղից այնքան ժամանակ, մինչև ամեն ինչ կարգավորվի:

«Եղբայրներս, ձեզ ընդամենը մեկ բան եմ ասում՝ այստեղից չենք հեռանում, մինչև իրավիճակը կարգավորվի: Եթե կարգավորվի՝ բոլորս միասին ենք  հեռանալու»,-հայտարարել է Թուրքիայի նախագահը՝ չնշելով՝ իրավիճակի չկարգավորման դեպքում իր ծրագրի մասին:

Նշենք նաև, որ օդանավակայանում ելույթի ընթացքում Էրդողանի կողքին կանգնած է եղել իր փեսան՝ Էներգետիկայի և բնական ռեսուրսների նախարար Բերաթ Ալբայրաքը: