Սուրճի սարքերին անհրաժեշտ են սպասք լվացող կանայք

Շատերի համար դեռևս խորթ է քաղաքը մաքուր պահելու մշակույթը: Տիգրան մեծ պողոտայում` Գրիգոր Լուսավորիչ  եկեղեցու հարևանությամբ գտնվող կանգառում տեղադրված սուրճի սարքից օգտվող որոշ քաղաքացիներ  սուրճը խմելուց հետո միանգամյա օգտագործման բաժակները թողնում  են  տեղում` զլանալով դրանք նետել 4 մ հեռու գտնվող աղբամանը: Այն, սովորաբար, կեսօրից մինչև հաջորդ օրվա առավոտ բեռնված է լինում աղբով, իսկ սուրճի սարքին մոտ այլ աղբամաններ չկան:

Սուրճից օգտվողները հիմնականում տղամարդիկ են, ովքեր, ըստ երևույթին շարժվում են իրենց տան օրենքներով, այն է` իրենց սուրճի բաժակը լվանալու է կինը: Արտասահմանում սուրճի սարք ստեղծողները չեն նախատեսել  սպասքը լվացող կին, փոխարենը ստեղծել են միանգամյա օգտագործման բաժակներ: Մերոնց մնում է կա'մ լրացնել արտադրողների բացը և սարքերի մոտ սպասք լվացողներ կանգնեցնել, կա'մ  ընտրել ավելի հեշտ տարբերակ` բաժակների համար աղբաման տեղադրել: