Կայուն զարգացումը համահունչ չէ ոչ մի ոլորտում

Բնապահպանները դեմ չեն Հայաստանում այլընտրանքային էներգետիկայի, հատկապես` հիդրոէներգետիկայի զարգացմանը, բայց եթե այն չի վնասում շրջակա միջավայրին.   «Երկիր»-ի հետ զրույցում ասաց «Հանուն կայուն մարդկային զարգացման» ասոցիացիայի նախագահ Կարինե Դանիելյանը:

«Մենք այդ հարցը ներառել ենք նաեւ 2012-ին Ռիո դե Ժանեյրոում կայանալիք ՄԱԿ-ի «Ռիո+20» համաշխարհային գագաթաժողովում ՀՀ-ի կողմից ներկայացվելիք առաջարկություններում: Հայաստանը, լինելով փոքր երկիր, ունի այլընտրանքային էներգետիկայի զարգացման դրական փորձ, սակայն, մյուս կողմից, պետք է նայենք, թե ինչպես է այն իրականացվում»,-  ասաց բնապահպանը` հավելելով. «Բոլոր նորմերը խախտվում են: Եթե մեկ փոքր գետի վրա դրվում է 8 ՀԷԿ, նշանակում է` գետը կորցրեցինք: Եթե Շաքին դարձրել ենք ՀԷԿ, կամ Թռչկանը ՀԷԿ պետք է դառնար` խախտում ենք էկոհամակարգը, նաեւ բնակչությունն է տուժում, որովհետեւ, ջրի հունը փոխելով անգամ, չենք կարողանում այդ գետի ջուրը ոռոգման նպատակով օգտագործել»:

Հարցին, թե կայուն զարգացման առումով ինչպես է առաջ ընթանում Հայաստանը Կ. Դանիելյանը պատասխանեց. «Կայուն զարգացման առումով մենք ոչ մի ոլորտում համահունչ չենք քայլում: Կայուն զարգացումը պետք է ներդաշնակ լինի, այլ ոչ թե վնասի»: