Պաշտոնական տվյալներով` գործազուրկ է երիտասարդների 27 տոկոսը

Պաշտոնական տվյալների համաձայն` երիտասարդության շրջանում գործազրկության տոկոսը 27 է. լրագրողների հետ հանդիպման ժամանակ հայտնեց Երիտասարդական ակումբների դաշնության նախագահ Ատոմ Հարությունյանը:

Նա տեղեկացրեց նաեւ, որ հոկտեմբերի 14-18-ը, ՀՀ սպորտի եւ երիտասարդության հարցերի նախարարության եւ Երիտասարդական ակումբների դաշնության համագործակցությամբ, նաեւ Եվրախորհրդի Եվրոպական երիտասարդական հիմնադրամի աջակցությամբ, Ծաղկաձորում անցկացվել է միջազգային «Երիտասարդական նախաձեռնությունները` հակաճգնաժամային դեղամիջոց» ծրագիրը:

Ծրագրին մասնակցած` Եվրախորհրդի անդամ երկրների 30 ակտիվ երիտասարդներ ներկայացրել են հետճգնաժամային իրավիճակի ազդեցությունն իրենց երկրների երիտասարդության վրա: Երիտասարդներն ընդունել են համատեղ բանաձեւ, որը կոչված է թեթեւացնելու հետճգնաժամային ազդեցությունը երիտասարդների գործազրկության մակարդակի վրա:

Նոր ճգնաժամի հավանականությունը երիտասարդները չեն բացառել, առավել մտահոգված են եղել Եվրոպայի ներկայացուցիչները:

Ա.Հարությունյանը նշեց, որ առաջիկայում Երիտասարդական ակումբների դաշնությունը նախատեսում է Հայաստանում անցկացնել երիտասարդ գործարարների համաժողով, որին կհրավիրվեն Սփյուռքի երիտասարդ գործարարները, եւ համապատասխան պայմաններ կստեղծվեն հայրենիքում ներդրումներ անելու համար: