Հայաստանը գլոբալ ցնցումներից չի խուսափի

2008 թվականի ֆինանսական ճգնաժամը լուրջ ազդեցություն է ունեցել հայաստանյան տնտեսության վրա, իսկ դրա երկրորդ ալիքը ավելի բարդ իրավիճակ կստեղծի. այսօր լրագրողների հետ հանդիպման ժամանակ ասաց տնտեսական գիտությունների թեկնածու Գրիգոր Հայրապետյանը:

Տնտեսագետը նշեց, որ հատկապես վերջին մեկ ամսվա ընթացքում գլոբալ ճգնաժամի երկրորդ փուլի մասին սկսել են ավելի հաճախ խոսել: Եվ սա օբյեկտիվ պատճառներ ունի. ճգնաժամի երկրորդ ալիքի պատճառ կարող է լինել ԱՄՆ-ի եւ եվրոպական մի շարք երկրների` օր օրի ավելացող արտաքին պարտքը:

Սակայն դեռեւս հստակ չէ, թե երբ է վրա հասնելու այդ ալիքը. դրա մասին միջազգային որեւէ կազմակերպություն կանխատեսումներ չի արել: Նույնիսկ հայտնի չէ, թե ինչ թափ կունենա այն` ավելի հզո՞ր կլինի նախորդից, թե՞ ոչ:

Սակայն փորձագետը չի բացառում, որ այն ավելի հզոր կլինի: Սա բացատրվում է այն բանով, որ երբ ճգնաժամի առաջին ալիքը սկսվեց ԱՄՆ-ից, Եվրոպան համեմատաբար ամուր դիրքերում էր, սակայն ներկայումս թե' Եվրոպան, թե' Նահանգները թուլացել են:

Ճգնաժամի այս նոր ալիքի դեպքում ավելի կսրվի սոցիալական իրավիճակը, կբարձրանա գործազրկության մակարդակը: Չի բացառվում, որ նույն իրողությունը լինի նաեւ Հայաստանում: Այս վիճակից խուսափելու համար պետք է ունենալ զարգացած կամ զարգացող տնտեսություն: