Սարկոզիի հույսերը ֆանտաստիկայի ժանրից են

Դրական է գնահատվում այն, որ աշխարհի հզոր պետություններից մեկի` Ֆրանսիայի նախագահը վերահաստատում է, որ Ցեղասպանության ճանաչումն այլընտրանք չունի, եւ Թուրքիան պարտավոր է առերեսվել իր պատմության մութ էջերի հետ:

Այսօր լրագրողների հետ հանդիպման ժամանակ թուրքագետ Ռուբեն Մելքոնյանը նշեց, որ այս հայտարարությունից հետո ավելի սրվեցին Թուրքիայում հակաֆրանսիական տրամադրությունները, եւ, ամենայն հավանականությամբ, ավելի կոշտ հայտարարություններ կարվեն:

Սակայն Ֆրանսիայի նախագահ Նիկոլա Սարկոզիի վերոնշյալ հայտարարությունը էական ազդեցություն չի կարող ունենալ հայ-թուրքական հարաբերությունների վրա:

Թուրքագետը ֆանտաստիկայի ժանրից է համարում Սարկոզիի այն հույսը, թե Ցեղասպանությունը Թուրքիայի կողմից մինչեւ տարեվերջ կճանաչվի. «Դա առնվազն իրատեսական չէ»:

Ռ. Մելքոնյանի խոսքերով` Սարկոզիի հայտարարությունները հաճելի էին հայկական կողմի համար, սակայն եթե սառը դիտենք, ապա որքան էլ Ֆրանսիան բարեկամ երկիր է, դրանք նախընտրական քարոզարշավի տարրեր էին պարունակում, ֆրանսահայ համայնքի ձայները շահելու նպատակ ունեին: