Մեծ շուքով նշեցին գրադարանավարի օրը

Հոկտեմբերի 7-ին գրադարանավարի օրվա կապակցությամբ Հայաստանի ազգային գրադարանում տեղի ունեցավ «Գրադարանային երեկո» խորագրով միջոցառում-ցուցահանդեսը, որի շրջանակներում գրադարանում կազմակերպվել էր ռուսերեն հնատիպ և հազվագյուտ գրքերի, ձեռքի աշխատանքների ցուցադրություն:

Հնատիպ, հազվագյուտ գրականության բաժնի վարիչ Մելանյա Կարապետյանն ասաց, որ ցուցադրության շրջանակներում ներկայացվել են տարբեր հեղինակների ստեղծագործություններ` ռուսերեն լեզվով թարգմանված:

«Ցուցադրությանը ներկայացվել է 1703թ. տպագրված ամենահին հրատարակությունը` Մագնսկու «Թվաբանություն»-ը, Սանկտ Պետերբուրգում թարգմանված` Մովսես Խորենացու ստեղծագործություններից, ինչպես նաև Պուտինայի նվիրած գրականությունից մի հատված»,- ասաց նա:

Ռուսաստանաբնակ գրող Ն. Յերմենկոն չէր կարողանում թաքցնել իր հիացմունքը, քանի որ «ամեն ինչ կանոնակարգված է եւ շատ լավ կազմակերպված»:

Իսկ գրադարանի փոխտնօրեն Ռաֆիկ Ղազարյանը, խոսելով Հայաստանի կույրերին գրքեր նվիրաբերելու մասին, նշեց, որ ազգային գրադարանի անձնակազմը մեծ գրականություն է հատկացրել ՀԿՄ Սոկրատ Շահնազարյանի անվան մշակույթի տանը:

«Մեզ ուրախությամբ ընդունեցին, քաջալերեցին մեր կատարած քայլը և առաջարկեցին շարունակել համագործակցությունը»,- ասաց փոխտնօրենը` տեղեկացնելով, որ համագործակցության շրջանակներում ցանկություն են հայտնել կազմակերպել շախմատի մրցույթ:

Ռ. Ղազաչյանը համարում է, որ յուրաքանչյուրիս բարոյական պարտքն է օգնել ֆիզիկապես տկար մարդկանց. «Բոլորս պարտավոր ենք մարդկային վերաբերմունք ցուցաբերել նրանց նկատմամբ: Եթե նրանց հետ խոսենք ինչպես հավասարը հավասարի հետ, նրանք իրենց լիարժեք մարդ կզգան»:

Ի դեպ, գրադարանում գործում է «Արև» ընթերցասրահը, որն օժանդակում է նման խնդիրներ ունեցող մարդկանց: